Cyrurgie

Van water carnouffele.

Van waters carnouffels die in de cullen somtijts wassen Daer of willic jou scriven. Ende dat wort ghewonnen in de holle sone ofte diuidimus (l. epididymus). dats daer die cullen anne hanghet. Nou willic daer of gaen ter cuere omme dat water hute te doene. ende dan commen

[p. 207]

eenighe leeke mesters die hute sniën den cul gelijc ofte hi ware ghescort maer dat es seere valsch ende sine weten niet wat si doen Ende aldus in desen manier selmen gaen ten werke. ¶ Int erste men sal nemen eene groete driecante naelde ende die naelde selmen crommen ende die naelde selmen steken in dat

⁺onderste van den cullenbalge ende dore dat didimus ende die naelde weder (fig. XLIV) hute commende ter huut ende dien draet selmen der dore trecken ende der in laten hangen tote dat hem dwater hute gheloepen si ende aldus selment laten .vij. daghe lanc ende daernae soe selmen die wonde suverlic heelen alsoet behoort. Ende eenighe mesters siin die de wint carnouffels oec plegen hute te latene met eenen naelde ende eenen drade alsoet vorseit es (zie fig. XLIV) ghelijc datmen hute laet water carnouffels ende eenighe meesters snidense hute met eenen vlime ghemaect in desen manieren aldus (fig. XLV) Ende daermede doen si sceeden den wint ende die zwellinghe.

+ C 76c.