Medicina, boek van medicinen

Mengerael

Bolismus es dat .1. mensche nemmer meer en wort versaedt hem en hongert altoes hoe vele dat hi eet. Ende dit comt bi ere couder nature die es in den mont vander magen ende dat met wacheiden. welke coude wacheit stect die spise nederwert ende daer sone blijft gene spise in die mage ende dat comt bi dat die porossen vander magen open siin. Ende om dat der magen geen spise in mach geduren. so hongert altoes den zieken. & dat comt bi dat die mage es altoes ydel. Het comt oec somwile bi scarpen humoren die daer in siin. & dat bekent bi dat die mont zuer es entie rupseninge zuer

[p. 97]

die hem comt vter magen ¶ Dit siin gemeine tekenen die mensce magert alle dage. ende dats om dat geen spise en blijft in de mage van den welken die leuere mach gecregen voetsel daer si den lichame met mach voeden. Ende si hebben van rechte den lichame licht. entie spise es onuerteert ¶ Dits die cure. Geeft den zieken tetene die vetste spise dieghi moget vinden. & gef hem drinken den starxten wijn. & sonderlinge root & zoete. Ende gef hem tetene pulment dat wel vet si. & dat gemaect met olien van oliuen. Ende ziedet dat vetste swinen vleesch dat ghi moget vinden & dat bequamelijxte. ende dat eete. Ende geeft hem tetene dese latuwarien. dya trionpiperion. dya calamentum. dya cyminum. dya galanga dese latuarien geft hem nuchtern. Ende sonderlinge so gef hem nuchtern tetene zoete ende rode wijnbesien. & men geue hem puluer van castorien met wine. Ende smeret hem die mage met olien van bayen. van vyoletten muskelijn ¶ Ende maect hier af .1. plaster dat ghi selt leggen optie mage Nemt enguun gesoden in wine. & daertoe doet puluer van comine. dit plaester legt warm op ten mont vander magen ¶ Eist dat die coutheit si met humoren. so purgeertse ierst met oximelle squillint. Ende purgeert die humoren. & sonderlinge die siin van souter fleumen met .2. dr. stomaticum laxatiuum. of met .2. dr. elcunarium dulce. want die esser oec goet toe.