Medicina, boek van medicinen

Van dat orinen vloyt

[p. 128]

Dyampne dats .1. andere ziecheit die den mensce toecomt. & dat comt bider crancheit vander blasen alsi vercout es buten harer rechter naturen. want si es selue naturlike cout om dat si es .1. zenewech led. Ende alse haer zenewen die in haren hals siin vercouden bouen haer naturlijc recht. dan en mogen si niet doen haer naturlijc werc. ende en mogen niet sluten den hals vander blasen sine moeten laten gaen dorine. Ende dus so pist de mensche siins ondankens ¶ Desen zieken so moet men sine materie digereren met simplen oximelle. & daerna purperen die humoren met benedicten. & daer af geuen .3. dr. ende s. Des derds dages daerna baedt den zieken sittende in enen dele waters tote ouer tliichaer ende ouer die lendenen daer in gesoden es alsene. rute. byvoet. mente. apie. persiin. keruel. Ende gef hem nutten teracle alse hi gaet vten bade .1. dr. getempert met sape van menten & met wine daer in gesoden es castorie. Ende naden vijften dach van siere purgacien. so gef hem elx dages te drinkene dit cyroop. dats die teracle alsoet vorseit es. het en ware .1. kint. of onder sine .12. jaren. want so wert hem te heet siere moruwer naturen ¶ Ende es die zieke te cranc. te jonc of te out. so en gef hem gene teracle. maer ziedt hem eyke applen in watere jnt welke dat ghi tempert dit puluer ende drinke. Nem die blase van .1. geyt of van .1. stier of van

[p. 129]

enen swine. dese bernt in .1. nuwen erdenen pot te puluere. & ete die eyke applen met sukere. Of drinke dwater getempert met slipe ierst gedroget ende gepuluert wel cleine. Dit ware oec goet die strawelioen hadde. Of die plage te pissene in siin bedde. Of dien de blase ware geplasmeert.