Borgerliicke Huyshouding

Vijfde Handelingh. Eerste wtkomst.

May. Roel.

May.

Waer komt ghy Roel vandaen?

Roel.

’Kheb gasten wesen nooden
Gaet vry wat haest naer huys: want ghy sult moeten dooden
Al watter is gemest.

May.

Ick meyn Roel dat ghy spot
Men brast by ons soo niet: Of hout ghy my voor sot.

Roel.

Ten sal gheen brassen zijn. Men sal een blymael gheven
Dat Godt ons Meester heeft soo langhe laten leven
Dat hy sijn Zonen mach gesont in vreughden sien
Van wien hy meynt dat hem sal eer en deucht gheschien.

May.

Dats noch het minste Roel, maer dats in allen talen
Sijn onderwesen nu, dat is het alte malen.

Roel.

Daer hebben sy wat aen. Den tienden niet verstaet
Of schoon een man al veel in vreemde talen praet.
Ick hou van mijns ghelijck. mijn Moeders tael ick prijse,
Al wat ick seggh’, ick oock lichtlick daer met bewijse.

May.

Men seyt ooc gemeenlijck: tpast oock op u wel eel
Een stront of Pannekoeck is een Boer eff n veel.

Roel.

Maer May. Ick noyt van u sulck een antwoort verwachte.

May.

Ia Roel. Ick hebse nu al onder mijn gheslachte,
Die daer wel voelen, en hebben oock inder daet
Bevonden, datter niets eygentlick vast en staet.
Sonder ’tbestieren van wel g’oeffende verstanden:

[fol.  D3v]

 

Want die zijn’t die alleen wel regieren de Landen;

 

En sonder wien oock al de Steden t’ondergaen,

 

Ia hoe heerlick en schoon sy oock verheven staen.

 

Tvervalt al watter is, goe zeden ende wetten

 

Waer naer d’inwoonder heeft zijn schreden recht te setten

 

En sonder wien oock al ’twelck tot de kerck behoort.

 

Door ghewelt of pracktijck onder onwaerheyt smoort.

 

Roel.

 

’Tmach wesen dat het wil ick salt u laten winnen;

 

Want ick ben, ja blijf bot, end kant soo niet versinnen.

 

May.

 

Ia Roel, die niet en weet, hoe soet den honigh smaeckt

 

Ten is niet vreemt dat die t’geswarm der Byen laeckt.

 

Roel.

 

Maer May gaet doch naer huys, ’ksegg’ datmen u sal wachten

 

Ghy zijt soo traegh, als of ghy op uw’ Vrouw’ niets achten.

 

May.

 

Ia nu mijn soete knecht, het sal wel wesen vaer

 

Ghy zijt onder u muts voorseker niet heel claer.