Tvoyage van Mher Joos van Ghistele

(II, 42)

[N]aer dat zij ghevisenteert hadden de voorseyde plecken, vertreckende weder omme drayende naer den rechten wech, voor bij lijdende vele schoonder plaetsen daer vele edeficien in ouden tijden ghestaen [heb]ben, onder al quamen duer eene cleene, lusteghe valleye ende planure, omme rijnct met wat ghebeerchs, ghenaemt de valleye van Assur, (128v) ter welker plecken eene stede ghestaen heeft, ooc Assur gheheeten, die in tijden voorleden deden maken een groot gheslachte uut Capadocien, van welken gheslachte men seit dat de heleghe rudder Sent Jooris commen es ende oec ter zelver steden gheboren was.³⁸⁰ Item dese valleye leden zijnde, zo comt men ter stede van Sofet daer der voorseyder mammelucken heere woonde, welke plecke noch ter tijt wel behuust ende bewoont es; eeneghe zegghen dat zoe plach te heetene Jacopata oft Sedowa. Ter zelver plecken zo es gheschiet tghuent dat Josephus seit ten derden boucke vanden Strijde der Joden, vanden twalefsten capittele toot den xxvi^en capittele. Te wetene dat de zelve stede de alder meeste weere dede die in alle dland van beloften ghedaen wart vanden joden jeghens den Romainen, ten tijden dat Tytus ende Vespasianus daer ghesonden waren omme alle dlant te bedeervene, ghelijc zij ooc deden, zomen dat claerder bevint inde destructie van Jherusalem,³⁸¹ maer andere zegghen dat tselve ghebuerde ter plaetsen ghenaemt Neptalim oft Ysopota;³⁸² watter af es dat weet God.

380 Ontleend aan Von Breydenbach, 54r-54v.

381 Bedoeld is (evenals in de vorige zin) Flavius Josephus, De bello Judaico.

382 Burchardus, V, 7 en Poloner, 260.