men den souldaen sien mach, want men mach hem den rugghe niet tooghen. Van al desen gheinformeert zijnde, zo worden zij gheleedt ten palaeyse, dat boven maten schoone ende costelic es, wel also groot als de stede van Denremonde, ligghende up eene maniere van eenen beerghe, an deen zijde vander voorseyder steden. (165v) Ten palaise commen zijnde, zo worden zij gheleedt duer neghen of tien schoone plaetsen, poorten ende salen, ende quamen zo jeghens een uutnemende scoon zomer huus, al ghewracht met costelicken steenen, ghesneden, verschilt met gaude, aisuere ende met aldertiere andere costelicke vaerwen. Van desen zelven huuse mach men vanden tween zijden uut sien duer schoone, costelicke, vertraille veinsteren, schoone vergult, in diverssche lustelicke hoven, prieelen ende bomgaerden, verchiert van aldertieren wel rieckende cruuden ende vruchtboomen. Daer in zijn ooc zeere vele fonteynen, niet bij natueren, maer bij consten daer ghemaect commende, metten welken men arouseert alle de voorseyde lochtinghen ende bomgaerden, ende hendelinghe worden zo int voorseyde huus gheleedt, twelke zij vonden tcostelicste dijnc, datmen ter weerelt dijncken mach, binnen alle de mueren beleyt ende insghelijcx tpavement met diversschen ghepolisierden steenen van allen soorten, als marberen wit, zwart ende root, serpentin steenen, profierianen, corniolen ende andere costelicke steenen van diversschen colueren, ende ooc zo costelic verschilt van alderande vaerwen, met cnopen, wronghen, compassen ende met Arabiske letteren, met weerke van mosaykerien ende andere, dat niet claerlic te segghen en waere, ende in midden van desen zelven huuse, zo es eenen viercantten put onttrent kniemaels diepe ende drie oft vier scerden wijt, daermen altijts coel ende versch water inne houdt met visschelkins (166r) daer inne zwemmende, omme dat de souldaen daer in zijne handen ende voeten zoude moghen vercoelen alst hem ghelieft. Ende den vloer van desen huuse was ooc beleit met zeer costelicken tapijten, daer up laghen vele cussenen, sommeghe ghedect met lijnwade, andere met zijden ende fluweele, ende eeneghe met gulden lakene, ende oec andere met ledere van India, dat van schoonder verwen es ende van zonderlingher goeder rueken. Te deser voorseyder plecken was de souldaen ende sadt up een cussen, ghevaudens beens ghelijc de cleermakers zitten, spelende tscaec jeghens eenen van zijnen heeren. Ende als de voorseyde den souldaen begonden te siene, zo daelden zij ter eerden, die cussende, ende alzo nakende deden tselve toot vier reisen toe, zo de trusseman hemlieden gheseyt ende ghewesen hadde, ende als zij voor hem quamen, seiden over luut hare begheerte. Naer dat zijse gheseit hadden, zo verhaeldese de voorseyde groote trusseman die hemlieden daer ghebracht hadde, naer de maniere des lands, ende interpreteerdese den souldaen. Ende was in effecte, dat zij den souldaen zijnder hoocheit ende moghentheit baden hemlieden te willen consenteren zijne letteren ende brieven van saulfconduyte omme zijne landen duere vredelic te moghen wandelene, welverstaende dat zij in gheene plecken begheerden te commene die den kerstenen generalic verboden waren, als ter stadt van Lamecha, daermen tlichaem van Machomet versouct, vanden tempel van Salomon ende generalic van allen den moskeaen ende oratorien. (166v) Ooc seiden dat zij bereet waren te betalene zulke tollen alsmen naer de ordonnancie vanden lande tallen passaigen sculdich es te ghevene, begheerende alleenlic duer zijne landen te moghen paysivelic wandelen, omme die te siene ende
Auteursrechtelijk beschermd