Tvoyage van Mher Joos van Ghistele
(1998)–Ambrosius Zeebout–
Auteursrechtelijk beschermd(IV, 6) [Het klooster van St. Katharina][D]it zelve clooster es een zeere oudt ghestichte, eerst ghefondeert bijden keyser Justinianus, ende schijnt van buuten eene viercantte plaetse (233v) met hooghen, steercken, dicken mueren daer in staen sommeghe veinsteren, ende en heeft maer twee dooren niet zeer groot zijnde, beleyt met dicken yseren platen jeghens dup- | |
[pagina 243]
| |
loopen vanden Arabianen ende anderen die daer somwilen commen onvoorsien, hoe wel mids der steercker plaetsen ende ooc der gracien Gods daer niet vele quaets en doen. Dus int voorseyde clooster commende, zo schinet wesende een cleen stedekin, alomme met straetkins dobbel ghelogijst, also wel boven als onder, daer in zijn twee water putten,Ga naar eind31 tbeste water datmen dincken mach, schinende dat God daer bij mirakelen verleent heeft, ende als men voort gaet, zo comt men recht jeghen de keercke die niet zeere groot en es, met loode ghedect, wat neder dalende, zo datmer in gaet van dier zijden met vijftien trappen ende vander ander zijde met acht trappen, al meest ghemetst van witten marber steenen, maer es wat doncker van luchten, eeuwelic vul grooter menichten van lampten hanghende, ende binnen zo reynlic ende cuusschelic ghehouden, dadt eerlic ende scoon om sien es. In dese voorseyde keercke staen over elke zijde acht colommen midsgaders den choor, den welken af ghescudt es up hem zelven naer de Griecsche maniere, waer af de twaleve zijn vul helichdoms besloten,Ga naar eind32 ande welke tafelen hanghen daer de heleghe in gheschildert staen die in elke colomme zijn, wiens hoochtijden ghehauden werden vanden Griecken naer de twalef maenden des jaers. Ooc (234r) zo staen over beede zijden vander keercken inde zijdemueren diverssche cleene cappellekins, toot xii toe, over elke zijde zesse,Ga naar eind33 al vul helichdoms, ende voor elke cappelle hanghen ooc berderen daer alle de heleghen in ghemalen staen diere in ligghen ende daer zij die maent duere vierte af houden, zo dat elke maent zijn celle heeft. Maer de religieusen van dier plaetsen, ghenaemt caloeyerij, hebben vele meer andere heleghen in haerlieder kalendario dan wijlieden doen. Dus commende inden choor, zoo sietmen den hooghen aultaer ronts omme los wesende, zo datmer van allen zijden an mach. Maer ter rechter zijde, onder tverwelf van eenen boghe, zo staet de sepultuere ende tombe vander helegher maghet Sente Kathelijnen, de welke ghemaect es van schoonen, witten marber steene, daer over hanghende altoos drie berrende lampten. Ooc zo staet over elke zijde vanden choor eene cappelle, uuten welken beeden men gaet in een ander cleen cappellekin recht achter den choor, dat eene zeere devoote plecke es daer niement in gaen en mach, hij en moet zijn schoen uut doen, ende dat es uut dien dat Moyses, mids den manslachte dien hij ghedaen hadde aldaer ghevloden zijnde uut Egipten, de schapen wachte. Ende daer hij ooc doe sach bernen den neghelentier bosch, welken vanden voorseyden viere niet en beschroeyde oft verberrende, maer altijts bleef even groene, uuten welken Onse Lieve Heere sprac toot Moyses, zegghende: ‘Comt tot Mij, maer doet u schoens uut want de plecke es helich’, ende daer zo gaf hem God de roede als (234v) rechter te wesene vanden volke van Ysrael, mids welker hij vele mirakelen dede; ooc zo sant hem Onse Lieve Heere God ter stont van daer te Egipten waert omme te verlossene de kinderen van Ysrael uuten handen der tierannen van Egipten, alsoe daer af ghescreven staet ten diversschen capitelen int bouc van Exodo. Tzelve voornoemde cappellekin hanct ooc altoos vul lampten, ende ter plecken daer Moyses dit voorseyde visioen sach, daer es nu up staende eenen aultaer met vier pilaerkins, daer onder hanghen altoos drie berrende lampten teender memorien. |
|