Tvoyage van Mher Joos van Ghistele

(VIII, 25)

(399v) [T]er stont als de patroons hare saken daer gheexpediert hadden, twee daghen stille gheleghen hebbende, seylden van daer met eenen redelicken ghetemperden winde, voor bij lijdende vele steden ende bewoonde plaetsen, alle ligghende

[p. 401]

up de costen ende ouveren vander zee int land van Barbarien, ter rechter hand ooc latende diverssche steenrootskins ende heylandekins, onder andere een wat meerdere et cetera, ghenaemt Pantalaria,²⁰⁶ maer es een aerm gheveerte, ghenouch onder tribuut des conijncx van Barbarien. Dat al leden, zo comt men an eenen point van eender wonderlicker hogher steenrootchen zeere diepe ter zeewaert in loopende, ligghende tusschen den colve daer Susa up leyt ende den colve daer Tounis up staet, daer ghenaemt Lecavo Booyn.²⁰⁷ Daer wat leden zijnde, quam hemlieden onvoorsien uppe een groot storem ende ongheweerte, zo dat zij bedwonghen worden, al hadden zij te Tounis niet willen wesen, de zee nochtans te rumene ende 't Colf van Tounis te kiesene, maer mids dat de galleyen daer wesen wilden, leyden voor winde ende seylden inde havene ende poort vander voornoemder (400r) stede van Tounis, latende over de slincke hand up de rootche de plaetse daer de vermaerde ende strijtbare stede van Carthago te stane plach. De welcke ghesticht wart zomen seit vander moghender coninghinne Dydo, ende daer de grootmoedeghe Hanibal domineerde, ghelijcmen dat wel bevindt inde historien vanden Romainen, ende principalic inde beghinselen der weercken van Virgilius int eerste capittele van Eneydos. Ooc zo spreect vander zelver steden Therencius int eerste beghinsel van zijnen boucken, welcke stede in haer zelven nu zo te nieuten es datmer gheene memorie meer af en siet, zoo dat datte wel ghetuucht Marius of Maro, verjaecht zijnde uut zijnen lande, hem vindende up de oude vervallene ruynen vander voorseyder steden van Carthago, disputerende ende difficulteyt makende wiens fortunen ende desolacien meerder waren, weder de zijne, of der zelver steden.²⁰⁸ Ende es te wetene dat de zelve stede ghesitueert was in eene onvruchtbare maertse, ghenouch santachtich, drooghe ende steenrootsachtich, zoot emmers als nu schijnt, luttel waters onttrent hem hebbende. Bijden welcken de coninghen ende inwoonders tzelve verssche water datmen daer oorbuerde, hadden ghemaect commende van eenen ghebeerchte verre van daer gheleghen ten lande waert uppe, ghenouch hem streckende naer de plaetse daer de coninclicke stad van Tounis alnu staet, die als (400v) doen niet en was. Welc ghebeerchte daer diverssche namen heeft, als Sauhyeu Roosas, waer uut men loot graeft, Syloch,²⁰⁹ ende meer andere namen naer de plaetsen in ende an de zelve berghen gheleghen. Tvoorseyde water spruudtte uut eender overvloyegher fonteynen staende int ghebeerchte, ghenaemt Sauhieu, ghemaect commende tooter steden van Carthago, door de valleyen, over de beerghen slom ende crom omme drayende, altoos den waterpas zouckende, met zo grooten aerbeide, consten ende coste, dadt onmoghelic ware om zegghen. Met eenen grooten dicken muere daer de conduten up ghemaect waeren daer twater duer liep, ten velen plaetsen inde dalen wel hooghe vijftich of tsestich cubitus ende lanc wel xxviii of dertich van dien milen, mids den waterpas zouckende, al up groote, zware, costelicke boghen verwolven van witten marber steenen, dat alte costelic ende zwaer een weerc ghezijn heeft. Maer es als nu meest al te nieuten, anders dan mer noch siet te zommeghen plaetsen sticken staen met vijf, zes oft acht hondert boghen te samen, teeneghen plaetsen meer, te anderen min, zommeghe noch schoone in wesene, zo datmen bescheedelic sien mach, wadt in ouden tijden ghezijn heeft. Item onttrent der voorseyder plaetsen, ende zo lancx den ouver vander zee toot bijder coninclicker stad van Tounis, twelc verscheeden zijn mach

206 Puntelleria.

207 Kaap Bon (Ras el Tib).

208 Ontleend aan Adorno, cap. 24. Bedoeld zijn resp. Marcus Terentius Varro en Gaius Marius, die in 88 voor Sulla moest vluchten, gevangen werd genomen, maar naar Afrika kon ontsnappen (cf. Lucanus, Pharsalia, II, 88-93). Wat Zeebout verder over Carthago meedeelt, wijkt echter te zeer af van Adorno's tekst dan dat men van rechtstreekse navolging zou mogen spreken.

209 Sauhyeu Roosas: het Saharië-massief. Syloch: gelet op de mededelingen over dit gebergte ‘syloch’ in Tvoyage VIII, 28 is bedoeld: Gebel Selat, ten zuidoosten van Tunis.

[p. 402]

onttrent tien van dien milen, staen zo wonderlicke vele steercke casteelen, sloten, torren ende fortressen, eeuwelic (401r) vul volcx van oorloghen wel betaelt ter bewaernessen des lands, dat wonder es, want het es den principalen slotele van alden lande van Barbarien, ende daer onttrent eist alte sorghelic vele wandelen met cleenen gheselscepe, ghemeerct dadt zelden es daer en ligghen galleyen, fuusten of cleene diefkins van oorloghen hare avontuere souckende, alzo wel heydenen als kerstenen, roovende ende vanghende al dat zij connen, twelcke daer dicwile ghebuert, ende principalic recht jeghens overe daer Carthago plach te stane, want daer leyt eenen grooten beerch ende steenrootche vul ouder scaerden ende scooren, ghenaemt Ghimbol,²¹⁰ daert nemmermeer of zelden zonder zeeroovers en es.

210 Grombalia.