Veelderhande schriftuerlijcke liedekens · dbnl

DBNL

Veelderhande schriftuerlijcke liedekens

auteur: anoniem Veelderhande schriftuerlijcke liedekens

bron: Veelderhande schriftuerlijcke liedekens. Frans Fraet, Antwerpen 1552-1554.

doorzoek de hele tekst

© dbnl 2002

DBNL vignet


154. Na die wijse. Alst beghint NUhoort een goet nieu liet Groote gracie is ons gheschiet O mensche en acht ghy dit niet Boert op v hooft en siet Wy zijn verlost wt swaer verdriet Godt heeft zijn volck vercoren Wy worden nv nieu gheboren. Laet ons te Bethleem gaen Als ons die Enghelkens doen vermaen Twarachtighe woort ontfaen En bidden dat wijt moghen verstaen En latent ons niet ontraen Laet ons malcanderen daer leyden En laten die beesten aender heyden. Den Enghel heeft zijn wiecken gheslegen Ick liet stof van die schriftuer weghen Die leecken hebbense oock vercreghen Sy doet haer herten seer beweghen Die vroukens neersticheyt pleghen Den gheest verwondert ons altemale Elck hoort zijn eyghen tale. Den os is wt ghelaten Hy loopt in alle straten Hy wil hem tonswaert saten Wilt hem trouwelijck aen vaten Hy compt ons oock te baten Hy stont so langhe ghesloten
[fol. T1r]
Dat heeft den Heer verdroten. Den Leeu hem openbaert Weest daer niet af veruaert Al wort hy wijt vermaert Hy is van sulcker aert Die verrisenis hy ons verclaert Siet dat v niemant af en keere Warachtich het is die Heere. Den Arent heeft hooch gheuloghen Gods Gracie heeft hem gheboghen Hy wil ons die liefste toghen Hy toont wat hy heeft ghesoghen Al en moghen zijt niet ghedoghen Wilt by Gods woorden bliuen En laet die gheleerde kijuen. Dit schenck ick v voorwaer Tot desen nieuwen iaer Susters ende broeders alle gaer Het belieft den Heer dats claer Ureest niet cleynmoedighe schaer Want wil Godt met ons strijden Wat schade ist dat wy lijden.