Van Brabant die excellente cronike

Dat .xvi. capitel. Van Sinte Truyt priester ende confessoor.

DJe heylige priester sint Truyt was van edelen geslachte, want sijn vader was ghenaemt Wiltboldus vanden hoge geslachte van vrancrijcke ende hi was graue van Haspegouwe eens deels ende van Kempelandt Sijn moeder heete Adele nichte van Pippine den eersten hertoge van brabant. Dese Trudo was schoon van lichame ende reyn van herten, een bequame woninge des heyligen geests Als hi .vij. iaer out was op een tijt gaende wandelen op sijn vaders acker so sach hi daer leggen eenen hoop steenen die vergaderde hi in manieren van eenre cleynder kercken na sijnre deuocien ende daer in sprac hi sijn gebet gode belouende door in geuen des heiligen geests, dat hi ter seluer steden van sijn eygen goet ter eeren gods een kerck timmeren soude ende die begif

[fol. 18v]

ten also saen als hi tot sijnre ouders erue mocht comen So quam dair ouer een quaet wijf siende die stenen so vergadert na tfantsoen van eenre kercken so sprack si quade herde woorden tot desen kinde ende heete hem ypocrijt, dien si van daer verdreef ende stiet om met haren voeten al dat hi gemaect hadt Mer die wrake gods quam op hair om dat si dat onnosel kint so beschaemt had, want si ter stont blint wert. Doe maecte si groot misbaer met screyen ende weenen vertellende den lieden hoe si de wrake gods vercregen hadt om datse theylich kint also beschaemt hadde Ende ter beden der goeder lieden so badt dat kint Trudo gode voor hair ende si wert dit siende Doen viel dit wijf neder voor des kints voeten hem danckende ende gode louende met al den volcke. Soe wies dit kint op in heylicheyt der zeden

Doe sijn ouders ghestoruen waren so bestont hi te dencken om sijn gelofte vander kercken te volbrengen, ende hi badt gode dat hi hem gracie daer toe geuen wilde Ende daer om hertelic biddende so wert hi op een tijt vallende in slape Ende die engel gods stont bi hem seggende dat sijn gebet verhoort was ende dat hi gaen soude totten bisscop van Mets om in die heylige scriften gheleert te werden, twelck hi dede. Ende hi wert vanden bisscop met werdicheden ende blijscapen ontfangen, die hem in corter tijt wel leerde na de bequaemheyt sijns staets Ende om te volbrengen sijn ghelofte vander kercken te timmeren soe sandt hi hem weder om tot sijnen lande waert. Daer na noch omt selue voorseyde stuck te volbrengen so versochte die goede sinte Trudo den raet hulpe ende bistant van sinte Remaclus die doe bisscop van Tongheren was bi wiens rade ende oock bi hulpe des volcs die heilige man Trudo een schoon notabel clooster begonst ende volbrachte dat binnen drie iaren. Aldaer die selue bisscop sinte Remaclus den heyligen voorseyden man gods Trudo priester ordinerende, hem orlof geuende al omme te prediken dat woort gods, biden welcken hi bekeerde tot gode wter maten veel volcx.

Het gebuerde op een tijt dat de heilige man gods ende priester sinte Trudo soude gaen prediken ende hi quam tot eender plaetse die gheheten was Sem daer af een ridder die heerlicheyt tot behoorde, dye lazers was ende blint ende was de geessel gods dragende in groter lijdtsaemheyt. Ende inder nacht so stont bi hem die engel gods hem seggende de toecoomste des heyligen mans Trudo, hem vermanende dat hi hem ter maeltijt noden soude, ende dat hi metten watere daer Trudo sijn handen mede wasschen soude, besprayen soude sijn crancke leden om gesontheyt te ontfangen Twelc als die ridder also gedaen hadt so wert hi ghesont, ende hi gaf sijn dorpe of plaetse voorseyt na sijn doot den cloostere van sint Truden in erfliken renten.

Ende als de fame sijnre heylicheyt daghelics wassende was mits nauolgende teekenen, soe gheuielt dat vele eedele ende andere middelbare personen haer kinderen hem gauen om in cloosterliken leuen op gheuoet te werden Den welcken hi den wech der waerheyt voor ghinc met heyligen zeden, dien sterckende met heyligen exempelen.

[fol. 19r]

Ten lesten als hem god lonen woude sijn duechdelic leuen, so sandt hi tot hem sijnen engel die hem condichde sijn laetste eynde Twelc als hi sijnen discipulen te kennen gaf so waren si verslagen mit groter droefheyt Ende sinte Trudo aenmerckende dat eynde sijns leuens, ende dat hi verwachtende was die eewige glorie, so op gaf hi gode sijnen geest in groter dancbaerheyt. Wiens licham alst int graf was geset ende noch niet met aerde bedect en was, so gaft wt hem al sulcken roke een vre lanck, dat die geen dier bi waren deen den anderen nyet gesien en conde, maer si vielen al neder op haer knien, gode gebenediende in sinen heyligen Ende na sijn begrauinge geschieden noch veel miraculen

Jnt voorseyde clooster van sint Truden so werden op eenen dach inder missen tijde ghenesen .xvij. siecke menschen bi der gracien gods ende verdienten sinte Truden. Van sijn tekenen ende miraculen isser .C. ende .Li. gescreuen sonder ontallicke veel andere. Sinte Trudo verschiet wt deser werelt in sijn .lxv. iaer op sinte Clements dach in Nouembri