Van Brabant die excellente cronike

Dat .xvij. capitel. Van sinte Veroen ende sijnre suter sinte Verone

NA die gheboorte ons heeren int iaer .viij.c. ende xxxi. soe regneerde Lodewijck die coninc van Almanien des goedertieren coninc Lodewijcx sone, daer vader af was die grote coninck Karel. Desen Lodewijke coninc van Almanien een kerstelic here werden geboren twee salige kinderen van eenre dracht, te weten een sone geheten Veroen, ende een dochter geheten Verona. Dit waren twee suuerlijcke kinderen verchiert mit ootmoedicheit, scamelheyt, zeebaricheyt ende miltheit Doe si tot .xv. iaren quamen so versmaden si de ydel glorie van deser broosscher werelt, den tempele gods visiterende ende gode met alre herten seer neerstelic beminnende Ende als haer vader de coninc int iaer daer na hem vermanende was tot huwelike so vloet Veron heimelic wten lande ende niemant en wistet dan sijn suster Verona die seere droeuich was om sijn afscheyden, ende hi seide dat hi niet wederkeeren en soude, mer dat hi dienen wilde sijnen scepper Doe seyde Verona Jst dat ghi mi aldus laet, so laet mi lieue broeder een teeken der doot weten ende in wat lande ghi sijt Doen seide hi Als dese bomen vallen sullen, merct waer werts datse sullen vallen want daer sal ick steruen Ende die bomen stonden voor die coninclicker poorten Na dat hi wech gegaen was so bleef Verona voort aen in haer vaders pallays seer schone ende allen menschen bequame Ende die coninc van hongherien begheerdese te hebben voor sinen wiue bi haers vaders wille, mer si weygherdet gheheelic seggende Jck betrouwe in Christum ende ick verkiese hem in eenen brudegom ende ick en wille ghenen anderen. Als haer vader was aenmerckende haer volstandicheyt so liet hijse met vreeden. Ende si visiteerde neerstelijck die kercken ende gaf haer goet den armen, Waer voor dat si van gode almachtich veel gracien vercreech, want si verloste eenen schonen maget die vanden bosen vyant beseten was inden pallayse vanden coninc Ende comende op eender tijt in dye stadt van Mense die ontsteken was metten vier der pestilentien so blusschede si dat mit haren deuoten ghebede

[fol. 19v]

Als haer ouders ghestoruen waren so gaf si alle haer goet den armen menschen om de minne gods. Ende stichtede een clooster biden Rijne geheeten Veroen houte daer si een wijltijts in wonende was. Ende vijf iaren daer nae so vielen westwaert die voorseyde bomen die voor die coninclike sale haers vaders stonden in verwonderinge van veele menschen. Doe begonste Verona bitterlic te weenen seggende Nv weet ic voorwaer dat Veron mijn broeder ghesoruen is, bereyt mi eenen wagen mit twee ossen ende eenen knechte, ende ick sal gaen soecken mijn broeders graf. So reysden si ende quamen in Brabant tot Louen. Ende als si quamen totter capellen vanden heyligen cruce bi de stadt van Louen, so bleuen die ossen vaste staende ende si en conden niet voortgaen. Doe hoorde die heylige maget Verona die stemme des engels sprekende tot haer aldus Dat deselue plaetse daer si bedende was haer graf soude sijn Ende dat si haer broeders graf vinden soude int dorp van Limbeke dat bi Halle is.

Een mirakel

Het ghebuerde datter waren twee pelgrims ghecomen wt Almanien om haer pelgrimagie te doen tot onser vrouwen die groten dorst hadden. Dit siende die heylighe maghet Verona nam haren stock ende stacken in die aerde. Ende doende haer gebet tot gode wt groter innicheyt haers herten. Ende ter stont spranck daer een schoon claer fonteyn, dye noch huden des dages heet sinte Veronen borne oft fonteyne

Daer ghinc dese heylige maget sinte Verona te waghene ende si quam tot Limbeke, ende ter stont so luyden van seluen alle die clocken vander kercken Ende als si inder kercken quam soe wert die kercke veruolt met sueten roke, die quam wten graue van sinte Veron haer broeder, ende dat graf wert van selfs gheopent so dat si haers broeders lichaem sach.

Na eender maent weder om so keerde Verona tot haren clooster te Verenhoute, daer si vele miraculen dede, altoos ghestadich inden gebede, vastende, wakende, lesende ende singende mit deuote religiose nonnen aldaer.

Ten eynde van .x. iaren nam de heylige maghet orlof van haren susteren seggende O mijn alder liefste susteren ick wil visiteren mijnen broeder, ende ick en sal niet weder keeren tot v, mer daer god wil daer sal ick rusten. Die gheestelike maechden dit horende weenden sere bitterliken ende namen alle gader oorlof. Daer na so ghinck die heylige maghet sinte Verona te wagen, ende nam niet sonderlinghe met haer dan den waghen Ende als si quam in der stadt van Mens so creech si so sterckelic den daghelicsen cortse dat si opten sesten dach haer sacramente ontfinck ende bereyde haer ter dootwaert Ende si badt den ghenen die bi haer stonden datse na haer doot haer lichaem opten wagen leggen wilden om vanden ossen gheuoert te werden. Als si hair dat ghelooft hadden seyde si O here in dinen handen so beueel ick mijnen geest. Ende so verschiet si van deser ellendigher werelt totter hoger vruechden des eewigen leuens Ende doe werden die clocken van selfs ludende die inder stadt waren ende alrehande siecke menschen werden ghesont. Doen meynde

[fol. 20r]

die bisscop ende alle dat volck vander stadt dat lichaem van sinte Verona te behouden, mer si en conden dat niet gedoen, want si cregen vreese ende beuinghen. Ten lesten so wert bi rade vanden wijsen dat heylige lichaem mit siden clederen bedect ende opten wagen gheleyt ende lieten die ossen dat vueren Ende ten lesten so quamt ter voorseyder plaetsen vanden heyligen cruyce dye nv heet sinte Veronen berghe bi Louen, ende met groter eerweerdicheit werttet daer begrauen ende rijckeliken alsoot wel betaemde ter aerden gedaen.