Van Brabant die excellente cronike

Dat .xxv. capitel. Van sinte Marien van Oygnyes

OMtrent den iare ons heren .M. C.C. soe leefde een vrouwe van wonderlijke ende heyligen leuen Maria van Oygnyes die van Nyuele gheboren was van rijcken ouders Als si noch een kint was so plach si dicwil te beden op haer knien voor haer bedde. Ende grote minne had si tot religiose personen Mer als si xij. iaer out was so deden haer ouders haer een ionghelinc trouwen, met welcken si nochtan in reynicheyt bleef Want van alle vleesschelijker begeerten verre sijnde so waren si met malcander verbonden in geestelijcker liefden, dien god die gracie gaf dat si inden viere niet en verbarren, ende een wijltijts dyende si den lazerschen menschen bi Nyuele.

Op een tijt voor den goeden vridach so begonste die heylige maget met veel tranen ende suchtinghen die passie ons liefs heren te oeffenen. So was daer

[fol. 26v]

een priester diese suetelijc vermaende dat si met silentien haer tranen soude bedwingen Mer also si schamel was begerende in goeder simpelheyt allen menschen gehoorsaem te sijn, soe achterliet si te dencken op die menscheyt Christi, op dat si haer tranen bedwingen soude ende keerde hair totter godheit ende mogentheyt gods, op dat si dair in vertroostinge vinden mochte Maer daer si den vloet der tranen wederhouden waende daer wt quam eenen meerderen vloet Want doe si aenmercte hoe groot hi was die om onsen wille so verworpen wert so vernieude weder haer droefheyt vele tranen stortende

Haer biechtvader die tuychde dat hi noyt in haer leuen vernemen en conde een dootlike sonde Haer siel bewaerde si met sulcker vresen, haer sinnen met sulcker nersticheit, hair herte met sulcker puerheyt, datmen aen haer niet en beuant een ydel woort noch onmanierlick opsien, noch lachen, oft om enige ydelheyt deser werelt haer oyt te verblijden. Seer vierich sonder aflaten was si in haer ghebet oft in contemplacien

Op een tijt met grooter vuericheyt des herten ontfunct sijnde inder minnen gods inden geest op getogen so sach si een engel vanden seraphinnen bi haer staen Ende als si gestoruen was so vonden die vrouwen die haer dode lichaem wiesschen teekenen van wonden, waer af si hem seer verwonderden

Dese heylige maget beminde seer silentie ende stilheit, alle geruchticheit scuwende, datse somtijts van des heilichs cruys dage tot paesschen haer silentie hielt nauwelijc een woort hielt nauwelijc een woort sprekende Ende so dat si ouermits dien bekende bi reuelatien des heyligen geests dat si sonder enich vegeuier behouden soude sijn

Daer na gaf si hair tot sulcker abstinencien, dat si des auonts als tot der medecinen ghinc ter maeltijt. Gheen wijn en dranck si, noch geen vleesch en adt si, mer si leefde van swaren roggen broode ende van fruyte, van erweten oft bonen ende dier gelijc Ende drie iaer lanc vaste si in water ende in brode, te weten, van des heylichs cruys dage tot paesschen toe Wat wil ick veel seggen van haerder conuersacien Al haer wercken sijn so groot geweest ende so wonderlic datse die ghemeyn maniere van leuen in heylicheden te bouen gaen, also haer legende dat wtwisende ende verclarende is.

Ten lesten soe werdt dese heylighe maget seer cranck van lichame ende in haerder siecten wert si dicwils gheuisiteert vanden enghelen gods ende ooc vanden heyligen, die si inden tijde haerder gesontheyt plach te dienen ende te eeren Ende sonderlinge die heylighe apostel gods sint Andries quam dicwils tot hair ende vertroostese Ja onse heere Jhesus cristus selue vertrooste haer minlic toe sprekende. ende Maria die moeder gods was ghestadelicken bi haer

Omtrent de vre haers verscheydens so verthoonde haer god die stede onder den heyligen inden hemel die si soude besitten Dies si hair verblijdende verschiet te noen tijde in die ouderdom van xxxvi. iaren, te weten, int iaer ons heeren .M.CC.xiij. des sondachs op sin

[fol. 27r]

te Jans baptisten auont seer salichliken met haren geminden Christo regnerende voort aen inder eewicheyt

Veel schone miraculen leestmen van haer na datse gestoruen was, als haer legende dat betugende ende verclarende is, mer si werden hier achter ghelaten om der lancheyt wille. Ende daer om so wie daer meer bescheits af begeert te weten, die mach dat soecken in dye gulden legende