Van Brabant die excellente cronike

Dat .xxvi. capitel. Van meester Jacob van Vytri regulier tot Oegnyes ende daer na cardinael.

Onder die bloemen die inden Brabantschen acker ghewassen sijn so ist ooc wel bequaem te vermanen die ghene die daer gheplant sijn geweest daer een af was die eerweerdige meester Jacob van Vitri, die yrst prochiaen hadde gheweest van Argentole bi parijs in vrancrijck, die welcke als hi vernam den name vander voorseyder Marien van Oegnies so achterliet hi sijn studeren in theologien tot Parijs ende quam tot Oegnies bi haer, ende si ontfinck hem minlijc, ende vercreech van hem met bidden dat hi biden bruederen regulieren aldaer bliuen woude Ende so vertijende de werelt so wert hi daer canonick regulier ende ooc wert hem die cuere beuolen van der prochien aldaer.

Dese maria van Oegnies voorseyt beual in haer doot onsen lieuen heere desen werdigen man ende vercreech hem veel gracien, sonderlinge van predicacien waer mede hi veel volcx bekeerde, ende inden rechten wech bracht

Ende als hi in vrancrijck predicte dat cruce tegen die ongelouige Albigoyse, so verwecte hi met sueticheyt sijnder spraken ontallijcke veel menschen die dat cruys ons heren aen namen Ende al sulcken gracie vercreech hi biden verdiensten der heyliger maecht, dat int exponeren der heyliger scriftueren ende ooc van predicatien niemant sijns ghelijck en was.

Jtem van desen eerweerdigen man so voorseyde de heylige maecht cristi inden gheest der prophetien totten godvruchtigen prioer van Oegnies aldus god heeft gesworen dat hi desen man totten bisscopliken stoel verheffen sal int heylich lant. Ende omtrent vier iaren daer na so gheuiel dat waer, want hi wert doe ghemaect bisscop van Acon.

Ende langen tijt daer na so quam dese eerweerdige bisscop meester Jacob van Vitri tot Rome bijden paus Honorius die derde neernstelijck biddende om vanden bisdomme verlaten te sine, die bi wijsheyt sijnre bedinghen hem absolueerde ende verliet hem van sijnder officien vanden bisdomme.

Dese eerweerdighe meester Jacob die bescreef die historie vander kercken ouer dat meer oft orientael kercke, ende vanden dingen daer gheschiet sijnde vander tijt dat die kersten van bi dees sijde der zee dair tlant besloegen ende beuochten.

Ontslagen ende aldus ontlast sijnde vanden laste des bisdoms voorseit so quam hi weder tot oegnies, ende met heyligher predicatien so omghinc hi die contreyen ende landen van Brabant

[fol. 27v]

dat volck al omme met duechdelijcke woorden informerende ende lerende

Daer na gheuielt dat die eerweerdige gheleerde man Hugo cardinael bisscop van Hostien die sijn grote vrient was paeus ghecoren worde, die ghenoemt wert Gregorius die negenste Ende so begheerde dese voorghenoemde eerweerdige heere ende meester Jacob van Vitri hem te visiteren wt minnen daer af die prior ende tconuent van Oegnyes seer bedroeft waren om sijn vertrecken Maer hi vertroostese seggende hoe dat hem swaer waer alsulcken vrient in alsulcker veranderinge niet te sien Ende so reysde hi te Rome ende wert bisschop ghemaect Tusculanus ende ooc cardinael

Onder veel teekenen diemen vint van hem bescreuen, so leestmen dat inder tijt als hi die cruysuaert predicte in Brabant so gebuerdet dat hi arbeyde om neder te leggen grote viantscap tusscen somige personen ende om dye te vreden te brengen Ende hi veroetmoedichde hem voor den genen die misdaen was met geboghen knien biddende met veele volcx dair bi sijnde, twelck hi dede eenwerf anderwerf, derdewerf, mer niet en conde hi verwinnen noch vermorwen Ende so keerde hem dese werdige bisscop seggende Jc seg v allen, die ons versmaet hi versmaet den genen die ons gesonden heeft. Ende vermaendese te bidden ende hi badt onsen here dat hi een teken wilde thonen ouer de versteenden mensche. Ende ter stont sijn gebet gedaen sijnde die versteende mensche verkerende sijn oogen viel driewerf neder ter aerden spuwende bloet ende etter wt sinen monde in groter veruaernissen des volcx wenende Doe keerde die eerwerdige Bonifacius tot sinen gebede, ende daerna hief hi den man op, die ter stont genesen was Ende siende voor hem staende sinen viant so ghinc hi tot hem wenende ende badt hem ootmoedelijc genade ende custen, so dat volc tot tranen verwect wert gode louende

Dese weerdighe man Bonifacius reysde dair na weder te Rome, ende cortelinge verschiet hi van deser werelt, Wiens lichaem also hi begeert hadde wert in Brabant ghebracht tot Oygnyes ende wert daer begrauen, wyens siele eer inden hemel was dan sijn lichame ter eerden quam, alsoe dat gheopenbaert was.