Dat .xxxv. capitel. Van Margrietken van Louen geheten fyere Margrietken
IN die stadt van Louen was een goet burgher die mit sijnre huisurouwen van sijnen tijtliken goeden ordinancie makende hem schicte te begheuen in dat clooster te Villeers in Brabant, daermen in dier tijt leyde een heylich leuen Beyde waren si deuoot ende ontfingen religiose personen ter herbergen. Ende si hielden in haren huysen een ionck maechdeken hare nichte gheheeten Margrietken, die hem ende haren gasten tameliken ende neerstelijcken diende So warender enige boose menschen die vermoeden datse veel ghelts vergadert hadden, ende quamen wel .viij. personen op eenen auont daer te herberghen. Als dye voorseyde man ende wijf des anderen dages meenden wech te reysen ende sonden tvoorscreuen maechdeken om wijn Ende daer en binnen doden ende vermoorden si man ende wijf ende alle thuysghesin dat si daer vonden Ende si stalen daer alle tbeste dat daer was. Ende als Margrietken weder quam metten wijne, so leyden sijse met hem ende ghinghen in een huys bi der stadt. Als Margrietken daer sadt met droefliken ghelate, so leyden die bose moorders haer totter riuieren die die Dyle heet. Soe wasser een van hem lieden die met haer medelijden hadde ende die badt voor haer seggende Laetse leuen ende ick salse te wiue nemen So en wouden sise niet laten, beduchtende dat si se melden soude. Ende so ouerdroegen si eenen van hem lieden een grote somme te geuen om dat hijse doden soude Dye welcke dat onnosel lammeken nam ende doorstack haer keele ende sijde met eenen messe ende also werp hijse inden Dyle. Ende die weerdinne vanden huse hadde dit al ghemerct, want si hadde dese bose menschen na gheuolcht. Des anderen daghes des morghens vroech so wert dese moort bekent, des alle die stadt beroert wert, ende men sochte de moordenaers, mer si en werden niet gheuonden Men vant die lichamen vanden doden, mer niet en vant men dat dode maechdeken. Corts daer nae wert si gheuonden van visschers diet niet en dorsten te kennen gheuen beduchtende datmen hem de misdaet op leggen soude, ende also groeuen si se aen den oeuer vanden watere. Op welcke stede namaels van sommighe personen licht ghesien was ende so ontgroeuen sise ende droegense tot Louen ter plaetsen daer hair lichaem nv is. Vele schone teekenen ende miraculen geschieden, die welcke noch huden dages daer leyt ende wert getoont in een kiste gecleet ende gheschoeyt inder manieren als si was, doe sie verdroncken sijnde wten water ghetrocken wert ende begrauen Ende wert vanden goeden lieden te Louen in alsucker werdicheyt gehadt, dat sise heten fyere Margrietken
Jtem dye voorseyde Amant haer meester, die met sijnder huysurouwen te voren vermoort was die openbaerde hem by den wille gods eenen monic van Vileers, die welcke hem vraechde in wat state hi ware Doe antwoorde hy Wat gracien dat wi hebben die hebben wi bi verdienten van Margrietken
Auteursrechtelijk beschermd