Van Brabant die excellente cronike

Dat .xxxvij. capitel. Vanden deuoten heere Jan van Ruysbroeck eerste prior van Groenendale den clooster

DJe eerweerdige heere Jan van Ruysbroeck pijnde hem van sijnder iuecht gode te dienen, wonende te Bruessel. Als sijn moeder was gestoruen so badt hi neerstelic voor haer siele Ende si openbaerde haer dicwils tegen hem geuende hair noot te kennen biddende hem om die hulpe sijns gebets ende seyde aldus O mijn alderliefste sone hoe lange tijt ist noch eer ghi priester werden sult. Ende als den tijt quam dat hi zijn eerste misse dede so openbaerde haer sijn moeder met bliden aenschijne, hem danckende ende te kennen geuende dat si ouermits der heiliger offerhande van alle pinen verlost was. Seer stille swigende ende rustich was hi, simpel van habijte ende gheciert van duechden ende eenuuldicheyt minnende. Als hi :lx. iaren out was, na dat hi veel menschen in de werelt een spyegel van heyligen leuen geweest hadde, so wert hi beraden mit somige sinen gesellen te gaen int clooster te Groenendale in zonyen, in die ordene vanden canoniken regulieren, om in alder rusten gode te dienen Mer niet lange en wast dair na dat hi prior ghecoren wert Ende so exemplaer ende stichtich was hi in sijnre officien dat hi in waken, in vasten, int hantwercke, ende inden obseruantien der ordenen alle die broeders te bouen ghinc Ja al was hi out ende weeck, nochtans bleef hi wt ghewoonten doende snode ende arbeydelijcke wercken, als mist te dragen op berryen/ te grauen, te deluen, ofte ander enige wercken noch ootmoediger ende snoder Ende al wast dat hi wrochte oft wat hi dede nochtan had hi sijn pater noster in deen hant, want hi was so vaste geoefent int schouwende leuen ende int werckende leuen, dat hi sijn broederen plach te seggen, dat hem bider hulpen gods niet swaerder en was als hi wilde sijn herte bi contemplacien tot gode op te heffen dan sijn hant an sijn hooft te doene. Costelijke scriften ende boecken heeft dese heylige man gescreuen, son-

[fol. 40r]

derlinge vanden scouwenden leuen eenen boeck vanden chiersel der gheestliker brulochten Jtem so heylich ende so familiaer was hi mit gode, dat hi onsen lieuen here Jhesum ende sijn lieue moeder ende ander heyligen plach te siene in sijnre contemplacien gheuoelende onsprekelike bliscap in sijnder herten Ende op een tijt onthelsden onse lieue here seggende tot sijnre moeder ende totten anderen heyligen Siet dit is mijn wtuercoren kint. Nochtans hadt dese werdige man dicwil veruolch ende temptacie van den bosen viant, die hem verthoonde in gedaente van vreeslike dieren om hem te turberen Item so deuoot was hi in misse te celebreren, dat hi dicwil alsulcke soeticheyt der godlijker tegenwoordicheyt geuoelde dat hem sijn lichamelijke crachten begauen, dat de ghene ter missen diende beduchte, dat die werdige man ouermits der groter soeticheit Jhesu sinen geest op geuen soude

Als hi in zijn .lxxxviij. iaer was so begonste hi in die lichamelijke crachten seer te crancken. Ende siende dat den tijt sijns verscheidens naecte so bereyde hi hem deuotelic ende blijdelic ter dootwert begerende ontbonden te werden ende bi christo te zijn Ende dicwil verhaelde hi twoort vanden souter Wanneer sal ic comen ende salic mi verthonen voor dat aenschijne mijns heren Als hi omtrent .xiiij. dagen te bedde gelegen had in tegenwoordicheyt vanden broederen gesont van herten ende met blinckenden aensichte soe verschiet hi seer suetelijc Jnt iaer ons heren M.CCC.lxxxi. op die octaue van sinte Kathelijnen, in dat .lxiiij. iaer sijns priesterscaps So was daer gecomen een deuoet ende geleert man, sonderlinge in medecinen, te weten, die deken der kercken van Diest, die seere familiaer plach te sijne met heere Jan van Ruysbroeck ende was hem comen visiteren in sijnre siecten So was hi in tegenwoordicheyt des lijcks inder kercken ende hi wert vallende in slape Ende daer vertoonde hem die heilige prior gecleet met priesterliken ghewade gaende ten outaer waert in alsulcker schoonheyt, dat hijt niet wtspreken en conste

Jtem vijf iaren na dat hi begrauen was vantmen sijn licham noch gheheel ende ongequest wtgenomen dat wterste van sijnder nasen, ende desgelijcx sijn clederen ende ornamenten daer hi in begrauen was waren ongeschent gebleuen. ende bi beuele vanden bisschop so wert dat heylige lichaem drye dagen lanck gesteld inden pant des cloosters, om daer te sien alle die wouden. Welck lichaem seer sueten roke was wtgeuende: