Van Brabant die excellente cronike

Dat .xxi. capitel. Van coninc Lodewijc de Lispere Ende hoe die Denen ende Noorwegers werder int lant quamen

 

 

 

LOdewijc des keysers ende coninc karels de caluwe sone wert coninc na sijn vader ende was lispende in zijn sprake ende sijn coninginne was des coninc van Spaengien dochter. Jn dier tijt so quamen die ongelouige Denen ende Noormannen weder int lant ende si destrueerden een groot deel van Vrancrijcke, van Engelant, van Pycardien, Brabant Vlaenderen, Hollant, ende opten Rijn deden si veel scaden, maer die borgen van Brugge ende van Omaers die bleuen staende. Niet te min so waren die Fransoysen hem volgende met groten heyre ende versloeghender in een strijt v.M. Ende daer na in een ander strijt bi Parijs .ix.M. ende si bleuen xiij. iaren in vrancrijke eermense bedwingen conste

 

Jtem int tweeste iaer van des coninc lodewijcx rijck so wert te middage die sonne al doncker datmen die sterren in den hemel sach. Ende coninc Lodewijc sterf geen oor achterlatende, mer sijn coninginne was beurucht Doe waren die heren vanden lande seer verslagen want de Noormannen ende Denen lagen int lant ende si waren van verscheyden sinne wie tlant regeren soude. Ten lesten ouerdroegen si te nemen Lodewijc ende Karleman beyde bastaerden van coninc lodewijc die gestoruen was om tlant te regeren Hier en binnen so gelach die coninginne van een sone diemen Kaerle heet ende wert karle die simpele geheten.

 

Daer na quamen in Vrancrijck .ij. coningen vanden Noormannen, die een heet Godeuaert ende dander Segefrijt met alte groten machte van volke ende hebben Vtrecht ghedestrueert ende soe trocken si opwaerts tot Colene in der stadt die si verbranden, ende wonnen Bonne ende Aken daer si in des keysers paleys haer peerden stalden. Ende tusschen den Rijn ende der Masen ende al Ardennen door destrueerden si steden ende castelen ende vele cloosteren roofden si, als Prunen Stabeloe sinte Bomakels Ende si destrueerden Ludic Tongeren Maestricht Sinttruyen ende Brabant Dit vernemende keyser Karel die derde te weten des vorscreuen Lodewijcx van Almanien sone, so was hi seer droeuich om deser landen verderfnisse. Ende om die te verlossen vanden ongelouigen Noormannen so quam hi hem te hulpe met groten heyre ende heeftse also omringelt datse ghekeeren noch gheulieden en consten

 

So maecte de een coninc Gouaert geheten pays metten keyser met voorwaerden dat hi kersten werden soude, behoudelic datmen hem een deel van vrieslant gaue, ende datmen hem ooc gaue te wiue Gille des conincx lotharis dochter die coninc van Lothrijcke was, ende die keyser ontfinc hem daer op ende wert gedoopt inder vonten. Die ander coninc Segefrijt en wilde niet kersten werden, mer hi vloot wt Lothrijke ende track in vrancrijcke met sijn volc Ende die .ij. voorseyde broeders die Vrancrijcke armelilc regeerden niet wel connende deselue Noortmannen wederstaen maecten

[fol. 92v]

 

vrede ofte bestant van .xij. iaren ouermits .xij.M. marck siluers die si hem gauen ende soe ruymden si tlant. Maer int iaer daerna soe storuen beyde dese bastaerden broederen Karleman ende lodewijc. Als die Noormannen dat vernamen quamen si weder met groten heyr seggende dat mits der doot der seluer twee gebroeders tbestant wt ware, ende gingen leggen te Louen om daerna in Vrancrijcke te comen. Die fransoysen aenmerckende dat haer coninc een kint was van .vij. iaren, so seynden si aenden voorscreuen coninc Karel den keyser biddende dat hi in Vrancrijcke comen wilde om tregimente vanden lande te hebben Twelc hi dede ende was coninc vijf iaren, mer hi conste die ongelouige felle Noormannen niet verdrijuen wt Louen ende Lothrijke hoe grote machte dat hi hadde. Mer si togen van selfs wt louen in Vrancrijcke om Parijs te beleggen Ende keyser Karel sant na hem hertoge Henrick, mer die Noormannen leyden hem lagen ende groeuen eenen putte inder aerden al bedect daer hertoge Henrick in viel ende wert ghedoot Keyser kaerle volchdese met groter machte mer hi en condese niet verdriuen Ende so wert hi beraden met hem pays te maken ende liet hem dat lant ouer die Seyne dat doe Neustria heet ende nv hetet Normandien om dies wille dat selue lant tegen Kaerlen wederspannich was