Van Brabant die excellente cronike

Dat xxiij. capitel. Hoe vrancrijc na kaerle die simpele gheregeert wert. Ende van Lodewijc die simpele sinen sone

DJt aenmerckende somige princen van Vrancrijcke na des simpelen karels doot datse sonder coninc waren so aennamen si Raydolphe den hertoge van Bourgondien die sone was van Richarde den graue die te Chartres die Noormannen veriaechde, ende dese Radolph regneerde in vrancrijcke xiij. iaren ende doe sterf hi So dachten die Fransoysen weder te crijgen haren iongen coninc die met sijnre moeder in Engelant was Ende si senden Willem den eertsbisscop van Sens in Engelant om Lodewijc haren coninc karel des simpele sone Mer die coninginne sijn moeder en wilde haer kint niet laten gaen dan bi middele van sekeren geloften ende condicien Ende dair op quam hi bi groter macht in engelant Ende die eertbiscop brachten tot Louwen in vrancrijc daer hi gesacreert is int iaer .ix.C.xx. Dese Lodewijc die ooc die simpele heete nam te huwelic coninc Henricx dochter van Sassen geheten Gerberga die suster was vanden eersten keyser Otto, ende hi regneerde .xi. iaren

Binnen desen iaren soe leet hy veel persecutien, want de meeste heren van Vrancrijcke maecten conspiratie ende sonderlinghe Hughe die grote graue van Parijs des voorscreuen Roberts sone die bi Soysson verslaghen was Ende hi stont na die croone om dyes wille dat Odo sijn oom voorseit coninc geweest hadde die wile dat coninc Lodewijc die lispere een kint was So geuielt dat dese lodewijc, sone des simpelen Karels bi quader conspiracien geuangen wert vanden Noormannen sijnen ongetrouwen ondersaten. Ende Kaerleman sijn outste soone die wert oock ghevanghen ghebracht tot Riemen daer hi sterf. Dit vernam keyser Otto wiens suster gheheten Gerberga coninc Lodewijc getrout had, so quam hi in vrancrijcke met groten heyre, als

[fol. 94r]

met .xvij. legionen om lodewijc sinen swager te verlossen Elc legioen is .vi M. vi.C.lxvi. mannen Die vianden van lodewijc ontsiende dese grote macht des keysers lieten hem wter geuangenis los ende vry. Dese lodewijc die simpele had twee sonen, als Lotharijs die na hem coninc wert, ende kaerle die hertoge van Lothrijck ende van Brabant wert, te weten cleen Lothrijc vander Masen nederwert totter Schelt. Ende soe wert Brabant doen van vrancrijcke ghescheyden twelc van coninc Pippijns tiden des groten Karels vader die coninghen van vrancrijke te gader gehouden hadden. Lodewijc de simpele coninc sterf ende wert begrauen tot sinte Remijs te Riemen