Van Brabant die excellente cronike

Dat .xxiiij. capittel Van coninc Lotharijs Lodewijcx sone Ende vander orloghen tusschen hem ende den tweesten keyser ende coninc Otto

LOtharis die coninc regneerde na Lodewijc sinen vader .xxxi. iaren Ende so hadde die tweeste keiser Otto sijns ooms sone een suster gheheeten Heylwich, die te huwelic nam die voorscreuen Hughe graue van Parijs, ende daer af had hi een sone gheheten Huge capet, Ende dien name hadde hi van dat hi ionc was, om dat hi den edelen kinderen daer hi mede speelde haer caprunen plach te nemen vanden hoofde Coninck Lotharis om dat hi vredelijker regneren mocht so maecte hi den voorscreuen graue Huge vader van Huge capet maerschalc van al Vrancrijcke. Mer corts daer na sterf Huyge ende wert tot sinte Dionijs begrauen

Daer na nam coninc Lotharijs oorloge aen tegen den tweesten keyser Otto sijns ooms sone om des lantswille van groot Lothrijke dat sijn voor vaders beseten hadden, ende met groten heyr track hi in Lothrijc rouende ende veel scaden doende den keyserike Ende die keyser die hem hier op niet verhoet en hadde lach tot Aken ende dorste hem niet roeren want hi daer op niet voorsien en was Ende als de coninc Lotharis weder gekeert was in vrancrike so dacht keyser Otto dat te wreken, ende hi vergaderde een groot heyre ende ontboot den coninc dat hi hem meende te versoecken in vrancrijc ontrent sinte Remijs dage. Ende soe trac hi in vrancrijke ende stichtede rooff ende brant al omme, om Riemen Louwen Soysson ende Parijs, niemant en dorste hem wederstaen, maer de kercken en destrueerde hi niet. Ende omtrent sinte Andries dach als hi met sijnen volcke op die Seyne lach so wert hem vanden Fransoysen scade gedaen inden steerte van sijnen heyre. Mer daer toe wast gebracht datter op genomen wert enen dach om met malcander te spreken van payse so datse vergaderden op een riuiere Ende daer maecten si den pays in dier manieren dat coninc Lotharijs verteech Lothrijc swerende dat nemmer meer te eysschen, dats te verstaen van grote Lothrijcke vanden Rijn nederwerts Ende keyser Otto gaf hem ooc ouer Dornijck ende ander plecken daer questie af was.

[fol. 94v]

Jnt iaer daer nae op sinte Symon ende Juden dach sachmen eenen strijdt van lieden die al vierich scheenen

Omtrent dese tijt wert Hongerien ende Polen bekeert totter kerstenheyt vanden heyligen bisscop Adelbertus bisschop van Praghen dye na van den Pruysschen ghemartelijt was

Jnt vierde iaer daer na sterf coninc Lotharis achterlatende eenen sone die Lodewijc heet, die niet veel langer dan een iaer regneerde in Vrancrijcke ende sterf sonder kint oft broeder Maer hi hadde eenen oom sijns vaders broeder van vader ende van moeder, te weten Karel hertoghe van Lothrijcke ende van Brabant, dye meest te Bruessel woonde bi sinte Goricx kercke, ende hy haelde sinte Godelen lichaem van Morsele tot Brussel in sinte Goricx kercke, want Morsele leyt int lant van Dermonde dat doe al Brabant was