Van Brabant die excellente cronike

¶ Dat .l. capitel. Vander ghemeynten die te Louen opstont Ende hoe die heren te Louen in die pijken geworpen werden Ende hoe hertoge wencelijn Louen weder belach, ende van sijnre doot te Lutzenborch

DJe gemeynte van Louen begonste weder grote beruerte te maken om der groter scattingen wille dye si geuen mosten, ende nochtan werden si buten al omme gehouden ende gherasteert vanden pensionarijsen die niet betaelt en waren Mer die heeren ende wethouders van Louen maectent so datse hem seluen ende haren vrienden betaelden Twelc der ghemeynte begonste te verdrieten ende maecten heymelic vergaderinge ende beleyden ter stont der stadt huys met groter menichten, ende die gemeynten maectent also si wilden, stellende commoyngmeesters, scepenen ende raet na

[fol. 148v]

haren wil ende trocken van lande te lande metten zegel vander stadt lijfrechten vercopende Ende si geduerden drie iaren in desen state ende gauen den hertoge ende sijnen rade groot goet om int regiment te bliuen

¶ Hier en binnen so heeft de hertoge wencelijn in sijn stadt van bruessel raet gehouden daer alle die staten vanden lande van Brabant vergadert waren Ende soe gebuerdet datter oock te bruessel quam van Louen die commoingmeester gheheten wouter vander leyen, die principael van desen opsetten vander gemeynten van louen, ende hi wert doot geslagen van here Jan van Kalsteren, die wt louen te Bruessel mits sijnen toe bringen was gheuloden. waer om dat die gemeynte van Louen seer gram was als si dat vernamen ende ontboden alle die hoede heren ende de beste vanden gheslachten die si opten heren huys vingen ende maecten groot ghecrijsch ende geroep van binnen Die van buten riepen met luder keelen als dulle lieden totten genen die op dat huys waren Werpt ons desen ende dien. Twelc lazen so ghedaen wert ende si ontfingense in haer pijken wel tot .xvi. of xvij toe Daer wert heer Jan platvoet iammerlic vermoort ende doot gheslagen ouermits eens weuers kint dien sach leggen onder een banck verborghen diet sijnen vader seyde, hoe hi dair achter een schutter lach die hem geerne hadt beschut vanden lijve, mer lazen hi ende die schutter waren beyde iammerliken vermoort. Daer stonden die ghemeynten bebloet vanden ellenboge totter hant toe oft si rynder oft ossen ghekeelt ende ghedoot hadden, ende alle dander werden gevangen ende iammerliken ghepersequeert

¶ Als hertoge wencelijn dese grote tyrantscap vernam soe quam hi met groter heyrcracht voor louen int iaer M.ccc lxxxij. op sinter Claes dach, ende lach daer voor .vij. weken ende .iiij. dagen Mer het wert gheordineert ende gemaect biden capittel van Ludick dat de hertoge binnen Louen in gelaten wert ende de principale van desen opsette die werden gebannen wten lande van Brabant. Mer niemant en dede hi ontlijuen dan eenen ridder gheheeten heer Jan de swartere die metter ghemeynten van Louen aen gehouden hadt, die wert onthooft voor der stadthuys

¶ Voort so wast gheordineert dat ten ewigen dagen vier schepenen vanden geslachten, ende drie schepenen vander gemeynten int recht sitten souden ende een commoingmeester, ende alle die gesworen souden van beyden partijen ghedeylt sijn half ende half. Dus heeft hertoge wencelijn alle dingen gheordineert ende is van daer te bruessel ghereyst, daer hi een wijltijts sinen tijt in ghenuechten gheleyt heeft

¶ Corts daer na so is hertoge wencelijn wt Bruessel ghetogen na Lutzenborch sijn lant visiteren ende besien, daer hi met siecten beuangen wert so seere dat hi ordineerde sijn testament ende alle sijn dinghen so hi best mochte na den tijt dien hi hadde want hi cortelinge gesterff, dies alle tlant ende vrou Janne wter maten droeue waren. Ende hi wert eerlic begrauen te Oryuaels int cloostere int lant van Lutzenborch begiftende rijckelijc tgodshuys met .ij.C. gulden erflic, ende alle tlant dore werden hem schone exequien gedaen Hi sterf int

[fol. 149r]

iaer ons heren .M.CCC. ende lxxxiij. op onser vrouwen conceptien dach den .viij. dach in December. Dese hertoge wencelijn was seer edel wt sijnder moeder lichaem gesneden ende sijn moeder en sterff daer niet af. Sijn oude vader was die goede keyser Henrick die .vij. Dese keyser liet achter een sone die Jan heete ende was coninc van Bemen, ende dye had twee sonen. die outste was die keyser Kaerle, ende dander was hertoge wencelijn daer nv af geseit is Noch so hadde hi een dochter die coninc Jan van vrancrijcke te wiue troude Dese hertoge wencelijn was een schoon man blide van aensichte, suet van sprake, milde ende seer liberael, so dat hem veel eedelen volchden Geerne plach hi te caetsen, te tornoyen, ende tot alle genuechten was hi genegen, mer hi en was niet victorioes Hi had van vrou Janne een sone mer hi sterf ionck ende leyt begrauen te Bruessel ten carmeliten daer vrou Janne na der hant ooc begrauen wert