Het Antwerps liedboek. Deel 1. Teksteditie

[p. 426]

190 Een nyeu liedeken

[Commentaar]

1
Hoort menschen, hier gheseten
Int Borgoensche crijt,
Die vromelijc drincken en eeten
En bedriven jolijt!
Omdat ons Keyser nu wort benijt
Ende so vromelic strijt, dies zijn wy verblijt:
Wi dancken al tsamen God gebenedijt.

2
Menich herteken was int benauwen
Int Borgoensche pleyn,
Omdat Gelder en Cleefsche landouwen
En die Gulkenaers cleyn
Spraken van onsen Keyser vileyn
Ende seyden certeyn, al tsamen ghemeyn,
Dat hem die cabbeljauwen hadden in.

3
Een herte vernedert van gheeste,
In Gods toeverlaet,
Niewers hem en maect de meeste,
Wert verheven jaet.
Maer die hem verheft, hoort menschelijc saet,
Wert vernedert quaet. Het blijct aent misdaet:
Vraget Willem van Guilic die gevangen gaet.

4
Die coervoorsters spraken te rade
Aen ons Keyserlijck graen,
Oft hy Willem niet in genade
Soude willen ontfaen.
Ons Keyser en wilde aen sulc vermaen
Gheen hant aen slaen. Hi wilde weten saen
Waerom dat hy den Arent was afgegaen.

[p. 427]

 

5

 

Die coervoorsters, elckander in stade,

 

Gingen Willem bevroen

 

Ende spraken: ‘Eert is te spade,

 

Hoort hier, Clevenaer coen,

 

Trec in Keysers handen op dit saisoen,

 

In der velden groen, als gevangen baroen,

 

En op diet u rieden wilt u ontschult doen.’

 

 

 

6

 

Nu en sal prophecie niet liegen.

 

Hoort al hiernaer!

 

Alle loosheyt en bedrieghen

 

Wert nu openbaer.

 

Tis so misselic, wiet berocket heeft

 

En dus heeft gesneeft. Vry Lelie, nu beeft!

 

Wi dancken God dat onsen Keyser noch leeft.

 

 

 

7

 

Gelder, Cleef en Guylic, die landen,

 

Recht vry ongespaert,

 

Begeren onder ons Keysers handen

 

Te sijne bewaert.

 

Wilde hyse ontfangen als Keyser vermaert,

 

Si zijn vol vaert nae den vroemen Libaert;

 

Hi wilse met Brabant, Hollant hebben gepaert.

 

 

 

8

 

O princelijc prince verheven,

 

Karolus coragieus,

 

Van uus gelijcken en was noit ghescreven,

 

Noch soe victorieus.

 

Het buycht al voor ons Keyser valiant.

 

Doer Gods crachtige hant, den Torcxen tirant,

 

Wilt God, ons Keiser sal besitten sijn lant.