Het Antwerps liedboek. Deel 1. Teksteditie

[p. 479]

215 Een nyeu liedeken van den haselaer

[Commentaar]

1
Hoort, ghi ghildekens alle,
Heere, vrouwen ofte knecht,
Maye, Griete, Lijse ofte Kalle:
Den haselaer es opgherecht,
Ghy moet u alle bereeden!
En hebt toch gheenen vaer,
Alle ghi quade beleeden,
Om te comen in den haselaer.

2
Moniken, nonnen, baghinnen,
Ghy lollaerts, ghy moet al me:
Wilt u totten haselaer pijnen
Al om die beste ste.
Hoort ghi een woordeken spreken,
Tsteckt u al in den crop:
Ghy sullet noch wel wreken,
Dus loopt al in den top.

3
Coopluden, ambachters, poorters,
Maect u alle bereet;
Duerwaerders ende muylstoters,
Den haselaer es so breet!
Trompetters, fluyters, tamboeren,
Nu loopt al, paer en paer;
Die ghaeren den elleboghe roeren:
Loopt in den haselaer!

4
Vrou Vuyle ende Laudate,
Loopt vry te dansse, onvervaert!
Weest tsavons laet opt strate,
Tgaet te vastelavontwaert!
Laet vry u werck legghen,
Weest vrolijck als nu ter tijt,
Wilder u yemant toe segghen,
Den haselaer es soo wijt!

5
Ghesellekens van avontueren,
Meyskens, maect gheen achterblijf
Mach u wat goets gebueren:
Avontuert het achterlijf!
Al willen u ouders kiven,
En achtes niet een haer;
Wilt by u boelken blijven
Oft loopt in den haselaer!

6
Ghy moet u alle ghereeden,
Die ick niet ghenomen en can:
Daer schuylen so veel quaey beleeden
Tusschen wijf ende man!
Tsavons zijn wi droncken,
Tsmorghens es die keele drooch:
Het wijf gaet dan proncken,
Den haselaer es soe hooch!

7
Als dese ghehoude vrouwen
Tsmorghens vroech opstaen,
Int wijnshuys mach mense schouwen,
Si souden te vleeschuyse gaen!
Als die mans dit hebben vernomen,
- Sijn wijf drinct den wijn, tes claer! -
Als die vroukens thuys dan comen,
Den man is in den haselaer!

8
Sotten, wat mach u gebreken?
Sottinnen, hebt goeden moet!
Als u die wespen steken,
Loopt in den haeselaer, metter spoet.
Die gaeren metten lenden wercken,
Compt doch metten hoop!
Papen ende clercken,
Die nooten zijn goeden coop!