Commentaar op het Hooglied
(1975)–Anoniem Commentaar op het Hooglied–
Auteursrechtelijk beschermd
[Folio W16ra]
| |
5[regelnummer]
Want al en sien wijs niet mit ogen
Nochtan can ons gheloue toghen
Dat hi is ende was ooc ye
Ende bliuet in personen drie
Een macht een kennen ende een goet
10[regelnummer]
Dat nemmer niet dan goet en doet
Die alle dinc ghemaect heuet
Dair alle leuende dinc bi leuet
Bi wes wille ende bi wes raet
Alle dinc dÜert ende staet
15[regelnummer]
In desen pointe siet die bruut
Hair lief mer niet uolcomen vut
¶ Tander point dair die bruut mede
Hair lief siet in salichede
Dats inden werke die hi heuet
20[regelnummer]
Gewacht ende dair si hier bi leuet
Si siet dat des hemels trone
Wijt breet is groot ende scone
Si siet sterre mane sonne
Der airden chierheit ende wonne
25[regelnummer]
Des luchts soetheit des waters vlieten
Ende wes die mensche mach ghenieten
Dat ghemaect na allen wensche
Om dats ghebruken sal die mensche
Hier in merct si sine scoonheit
30[regelnummer]
Ende sine grote wairdicheit
Nochtan is hair dit al clene
Bi dat si siet mit herten rene
Wat al hair lief die brudegoom
Heeft ghewrocht door horen room
35[regelnummer]
Si siet hoe scone hi in miracle
Was doe hi wrachte sonder acle
In blinden in sieken ende in doden
Die hi loste uut allen noden
Ende hoe hi ouer al ghedichte
40[regelnummer]
Tuolc mit goeder lere verlichte
Hi was scone in siin verrisen
Dair in sal men billic prisen
Hi was utermaten scone
In dopuairt tot des hemels trone
| |
[Folio W16rb]
| |
45[regelnummer]
Hi sceen ooc inden heilighen gheest
Scone doe hi mit groter feest
Sende inden urienden sijn
Alle deser scoonte schiin
Heuet die bruut wel ghesien
50[regelnummer]
Als wi al hier hair horen lien
¶ Mer die scoonheit die noch leget
Int derde sien die uerweghet
Alle sien: mar dats verborghen
Ons allen die hier nv om sorgen
55[regelnummer]
Leuen ende in menich liden
Dair sulwi ewelike verbliden
Sonder noot ende rusten mede
Emmermeer in allen vrede
Noch heeft die bruut een ander sien
60[regelnummer]
Dair si scoonheit uut mach tien
Vte des brudegoms twee naturen
Dene is in godliker figuren
Dair hi den enghelen altoes is scone
Die verlicht ins hemels trone
65[regelnummer]
Dair hi voir die heilighe verscijnt
Ende nemmer van vrouden fijnt
Desen can si noch niet sien
Volcomelike. mer het sal gescien
Als si mit alle haren leden
70[regelnummer]
Sal comen ten eweliken vreden
Doch en ist hier niet ontoghen
Hier te male sine hebben die ogen
Der herten dair in begheringhen
Dits uoetsel bouen allen dingen
75[regelnummer]
¶ Dander nature is die menscheit
Dair si in siet grote scoonheit
Als hier bouen is gheseit
Hier mede si dat heue gheleit
|
|