Commentaar op het Hooglied


CVIJ Van hinder der ghelouen Want die bruut mocht hebben hinder Te vergaderen gods kinder In prediken ende in goeder lere Dat si eerst ontsach zere
[Folio B19vb]
5[regelnummer] Dair om gheuet hi hair hier troost Dat si van hinder is verloost Tweerhande hinder was Inder ghelouen eerste pas Dene dat ongheloue so groot 10[regelnummer] Was dat alle uolc besloot Dat bi den winter is ghenomen Want die winter laet niet comen Vter airden enighe vrucht Om sine coude lucht 15[regelnummer] Des spreect die bruut al hier Die winter is verleden scier iam enim hyems transijt xxxvij inden winter is quaet werken in deser letter sulwi merken 20[regelnummer] dat wel winter heten mocht Die tijt dat die ioden onsocht Gode vingen ende bonden Gheselden plagheden ende wonden Ende ant cruce hinghen mede 25[regelnummer] Proeft wie hadde sekerhede Doe sinte pieter al versakede Gods doe hem dat wijf ghenakede En sprac du sijs mit hem hiere Dair hi hem warmde biden viere 30[regelnummer] Proef was die winter doe iet cout Doe sinte pieter die was so stout So cout was worden in ongheloue Dat hi viel in des twiuels cloue Dair om spreect wel die scrifture 35[regelnummer] Dat cout was ter seluer vre