Commentaar op het Hooglied

(1975)–Anoniem Commentaar op het Hooglied– rechtenstatus


CCXIX Hoe die bruut den brudegom hout ende mit hair leet DIe brudegom is nv comen Buten dat heeft wel vernomen Die bruut ende heuets groten lust Dat hi van hair mach siin gecust 5[regelnummer] Lief te cussen ende dair of te sceiden Thant. dats groot verdriet hem beiden Ende want die soete bruut begaert Te bliuen mitten coninc wairt ¶ Des spreect si wel soete minne 10[regelnummer] Ic sal di gripen mit rechten zinne Ende sal lieuelijc leiden di In mire moeder huus hier bi Ende in die slaepcamer mire moeder Dair saltu mi maken vroeder 15[regelnummer] Ende leren ic sal di dranc uan wine Die gecruut is ende fine Ende most mine appel greine Die lustelijc is ende altoes reine apprehendam te ducam te in 20[regelnummer] domum patris mee et in cubiculum genitricis mee ibi me docebis et dabo tibi poculum ex vino candido et mustum malorum granatorum meorum. Cxxxij
[Folio B42va]
25[regelnummer] ¶ Die lieue bruut die heilige kerke Anegrijpt den brudegom mit werke Die si in sire minnen doet Ende sine ghebode wel behoet Si laten vriendelijc mit eren 30[regelnummer] In hare moeder huus mit leren Die si leert. ende hem toe trect Die siele ende uanden sonden brect Moeder der alre liefste bruut Die uten noorden is comen uut 35[regelnummer] Dats die sinagoge ghewis Want dese dair of comen is Abraham die grote uader Hadde .ij. kinder alte gader Van ysaac quam ioedscap 40[regelnummer] Van ysmael die heidenscap Des is die heidenscap al comen Van ioden als ghijt hebt vernomen Dus moghen wi wel dochter togen Mandragora der synagogen 45[regelnummer] Der synagogen dochter is Mandragora bi recht gewis Want si is uan eerst geuoet Bider synagogen spoet Mandragora die bi besceide 50[regelnummer] Hair lief gripet ende bi gheleide Brenct alter synagogen Dat gods huus is als wi mogen Proeuen bider ware scricht Want op hair al is ghesticht 55[regelnummer] Dat beghin uan salicheit In desen huse heeft si geleit Die brudegom mit sinen scaren Want sine wil rusten no sparen Sine heb hair lede gheleit 60[regelnummer] Te gode inder kerstenheit Si leden in hare moeder camer Dese moeder is bequamer Dan deerste die se heuet geuoet Dits die kerstenheit mit spoet
[Folio B43vb]
65[regelnummer] Diet in gode altoes wint Ende bairt wat si te gode vint Der moeder camer is die scricht Dair gods heimelicheit ghesticht In is : al mit salicheit 70[regelnummer] Hier heeft die bruut hair lief geleit Om dat hise hier sal leren Hoe si hair setten sal ter eren Gods ende uast in hem becliuen Dairse niement mach driuen 75[regelnummer] Hier dats in dese lere Wil si doen den coninc ere Ende scenken hem den soeten dranc Van rechter minnen al gemanc Van wine. die mit crude gemaect 80[regelnummer] Fiin is ende wel gheraect Dats lere mit goeden werken Die wil si geuen inder kerken Ende most uan appel greine Wil sine scenken dit alleine 85[regelnummer] Beduut te male verduldicheit Wil si in doghen ende in arbeit Liden door sine soete minne Verduldelijc mit allen zinne

Vorige Volgende

CCXIX Hoe die bruut den brudegom hout ende mit hair leet