Dits tcapittel daerin dat men termineren sal vanden linien vanden levene
¶ Omme dat die linie vanden levene boven den andren linien es principaelre sekere ende ghemeinre ende meest blickende. Daer omme so selen wi segghen ten iersten van deser linie
Nota ¶ Es dat sake dat dese linie es ghestrect tote den wortel vander hant ofte harde naer. dat bewiset lanc leven. Ende eist dat si cort es. Soe bediet si cort leven. Ende naer hare lancheit of cortheit. So es iudicerne vander doot of vander lancheit vanden levene. Ende om dese redene so essi gheheeten linie vanden levene. Het es oec te wetene dat alse die drie principael linien wel gearticuleert siin ende wijt van maten die drie principael linien siin die den driehoec maken ende alsi siin van goeder verwe niet te bleec niet te roet. dit. be. goetheit van complexien. Ende es dat sake datter twee ten minsten niet wel ghearticuleert siin ende wijt van maten. ende niet blicken. dit bediet cort leven. Want goede articulatie comt van goeder dispositie van binnen de welke dispositie es teken van langen levene ¶ Es oec dat sake dat dese linie gaet van daer si beghint tote den wortel vander hant achtervolghende al even groot al omme. Dit .be. ghesontheit ende goede dispositie ende stoutheit ende ghestadecheit. Eist dat dese linie rechte es ende nauwe ende subtijl daer dat si vergadert met der suchtere vanden driehoecke. dit .b. subtijlheit ende goet raet. Ende tselve es te segghene vanden andren linien. Want al de linien die recht siin. niet te wijt noch te nauwe wel ghecontinuert wel gheset wel ghevarwet sonder wriven ende sonder warmen niet te bleec niet te root dit .b. subtijlheit getrouwecheit ende goeden raet.
Auteursrechtelijk beschermd