Dits tcapitel van den linien die omtrent de linie vanden levene staen
¶ Eist dat die linie vanden levene heeft een cruus ten ende wert vander hant. also dat si versceeden es in haren ende met ere linie of met tween. dit bediet. ghetempertheit ende goetheit vanden ende van den levene. ¶ Es dat die linie van den levene crom es ende root ter suchter linie wert boven. dit .b. quaet. rouwe ende luxurie. Eist dat si vele vouden heeft te deser vorseider stede. dit .b. verwandelinge ende verkeringhe van properen rade. Ende als boven ter vorseider stede in de linie vanden levene daer si ane die suchter linie comt. vonden wort aldus daneghe figure. Y. dit bewiset toe comende rijcheit ende oec dingniteit ende werdecheit. ja als dopen van deser figure voreseit es ten dume waert. Maer alse dopene vander vorseider figuren es ten slaghe wert vander hant. So bediedet scade ende quade aventure. ¶ Es oec dat die linie vanden levene heeft vele linien ten holle wert vander hant die roet siin dit .b. onghedoechsamheit ¶ Eist dat dese vorseide linie heeft putten die gaen ghetact ghelijc ere roeden. dit .b. vol van luxurien ende vol van scildinghen. die omme siin scilden ende omme siin luxurien sal ghedoghen storttinghe van bloede. ende sal oec daer omme lede verliesen ende selve lieden doot slaen. maer es dat dese vorseide ten dume wert gaen of strecken. So bediedet tcontrarie van dat hier voreseit es ¶ Alse du vints een .O. of enen rinc als dese figure gemaect es 0 bider linie vanden levene te arme wert Dit .b. dat een mensche sal verliesen ene oghe. Ende vint mer twee. So sal hire .ij. verliesen. ¶ Ende het segghen eneghe eist dat men vint .iij. cromme linien die beghinnen ter linien vanden levene. ende enden in den wortel vanden dume. ende
Auteursrechtelijk beschermd