Chiromantie

Sequitur capitulum de triangulo

¶ Alse de driehoec volmaect es vander rechter linie ende vander suchter linie. tusschen den wortel vanden dume ende den wortel vanden iersten vinghere Dit heet die upperste hoec van den driehoecke. Maer die daer steet in den wortel vander hant ende ghemaect es metter linie vanden levene ende met der linie van den fondamente. dit heet de rechter hoec. Ende die hoec die es ghemaect met der suchter linie ende met der fondament linie. Dit heet de suchter hoec ¶ Alse dan de driehoec effene es. of herde naer effene. dit bediedt ghesontheit ende ghetrouwecheit ¶ Eist oec also dat de drie linien daer mede dat de driehoec ghemaect es. rechte siin ende ghecontinuert ende wel blickende ende wel gheverwet. Dit comt van ere goeder dispositie van binnen. die goet ende naturlec es. ¶ Eist oec dat de driehoec heeft spacien gnouch. dit .be. miltheit. Ende eist dat de spacie es subtijl ende van goeder varwen. Dit .be. goede complexie. Maer es dat sake dat anders wort vonden. So eist anders te iudicerne ofte tcontrarie. Eist dat de spacie es rigghende. dit .be. droecheit Ende

[p. 196]

essi hoghe ghevarwet. dit .be. seicheit in thoeft beiaegcht van coude ofte andersins. Ende dit es gheseit van der spacien vanden driehoecke also na als men mach ¶ Het ghevalt somtijt dat de rechter linie ende de suchter linie maken enen hoec in tholle vander hant. ende dan es de spacie van goeden poente niet te wijt noch niet te nauwe. Dit bediet miltheit. Ende als dese ij. linien niet vergaderen. dan ne makense ghenen hoec. Ende dan of de hant es daer herdt. ofte subtijl. Eist dat si herdt es. dit bediet engien ende vorsinnicheit. Maer essi daer subtijl. dit .be. miltheit omme blickende ende ydel glorie te hebbene ¶ Ende als dan de rechter linie lijdt de stuchtere (l. suchtere) linie. ende daer ne gheen recht hoec en es. Dan berouwet hem dicken van ghedaenre miltheit ¶ Eist oec dat een cruus wordt vonden in den driehoec. dit .b. haetscap ende nidecheit ende verradenisse ¶ Eist oec dat die twee vors. linien vele versceeden siin. ende si maken enen subtilen hoec sonder cleine linien daer omtrent ende sonder telgheskine Dit .be. hantieringe ende minne van goeden gheselscape ende van sconen vrouwen ende van sconen cleedren ende van zoeten sanghe. Omme dwelke segghen eneghe dat het bediedt onmedesamheit alse dese linien ne ghenen hoec en maken.