Chiromantie

Dits tcapitel vanden rechtren hoecke.

¶ Nu es te segghene vanden rechtren hoecke. weder hi scerp of plomp of recht es. ¶ Eist dat sake dat de rechter hoec recht es welghemaect ende wel blinckende sonder ander linien. dit bediedt goetheit van bloede ende van gheeste ende dat een mensche wel ghedueren mach tere stat. Omme dwelke het betekent ghesontheit beschedenheit ende goede wandelinghe ¶ Eist oec dat hi scarp es. dit .b. hoefscheit. Maer niet so milde als ofte hi recht ware ¶ Eist oec dat de hoec plomp es dit .b. quade dispositie quade wandelinge niet vroet ruut ende plomp slapende ende roekeloes. ¶ Ende comen

[p. 197]

dese twee linien niet te gadere. dit .be. dat een mensche niet ne roect van ere wareit ende van quader conscientie ¶ Ende het segghen eneghe dat als men vint dese figure [teken, overeenkomend met een 7, waarbij een naar rechts aflopend haaltje door de steel gaat] rechte in den vors. hoec. ende rooet. dit .b. dat een mensche sal winnen knechtkine. Ende na der menechvuldecheit van deser figuren. Sal een mensche kindre hebben. ¶ Ende eist dat men een cruus vint in desen vorseiden hoec. dit .b. ere ende goede wandelinghe