Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Diederick van Elsaten die xvi.Graue, die welcke de kercke van sinte Baselis dede stichten binnen Brugghe, ende schanc daer het heylich bloet, datmen daer alle iaer omme draecht.

¶ Dat.xxij.Capittel

DIederick van Elsaten was die.xvi.Graue in Vlaendren, ende hi was Gheertruydts van Elsaten sone des houden Robrechts svryesen dochtre, ende was sustre van Adelye der Coninginne van Denemercke, die welcke moedre was vanden goeden graue.K.camuts Dese voorseyde Diederic was in alle den steden van Vlaendren eerlic ontfangen, ende brac of alle pointijnghen, settinghen, ende alle exactien, ende maeltoten, die Willem van normandyen sijn voorsate gheordonneert hadde. Ende hy hilt ende regierde tlandt in groten payse. Clemencie sine moeye die weduwe was vanden ionghen Robrecht die Vriese, die welcke sustre was vanden paeus Calixtus, dye wilde te haren lijue hebben tlandt van Vlaendren, want die Coninc van Vranckerijcke ontboot haer dat si oorloge soude stichten yegens Diedericke van Elsaten. Dit vernemende Diederic, tracteerde soetelijck metter weduwe Clemencie, ende beloefte haer te gheuene tot hueren lijue het derden deel vanden demaynen van Vlaendren voor huere byleuijnge, ende si en Diederick wel ghepayt. Dese Clemencie stichtede twee nonne cloosters, het eene te Borburch, ende tandere te Auennes. Int derde iaer van Diedericx heerscappye, Clemencie wordt siec, ende si ontboodt den graue Diederic, ende si wilde maken haer testament. Ende al dat landt dat si hadde in Vranckerijcke, ende haren schat naer haer verscheeden van deser werelt, dat gaf si Diederick, om dat hy huer so vriendelicken plach te vysenteirne, alst recht was, want haren schat ende alle tbeste dat si hadde, was haer ghecomen van haren man, den ionghen Robrecht die vriese, die des voorseyde Diedericx oom was. Ende aldus naer der doot vander seluer Clemencie, wordt Diederick geweldich here van Vlaendren al tot beunen toe. Binnen desen tijden quam die nieumare in vlaendren, dat die stadt van Ihrl'm beleyt was vanden Agarijnen, ende sarasinen. Dit vernamen die kersten coninghen ende ghinghen te Roome tot den Paeus om sine benedixie, ende ontfingen dat cruce omme ouer te varene naer Iherusalem.