Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die Coninck Lodewijc van Vranckerijcke, met sinen neue Willem van Dampyere, ende met alle sine Leenhouders track in Barbaryen, teghen die vyanden Gods die Sarazijnen.

[fol. xl.v]

ITem binnen den seluen iare voer sinte Lodewijc in Cartagyen ende te Tunes ende versloech daer met sinen gheselschepe int woudt van Bulgheryen, int landt van Barbaryen seere vele Sarasijnen ende Moorianen, ende daer bleuen ooc sommeghe Kerstenen doodt, ende een edel kersten here gheuanghen. Ende Willem van dampyere wordt in dien wijch gequetst ende gheuanghen, ende hi wordt gelost, int wederkeeren naer Vranckerijcke, int iaer ons heeren.xij^c.ende.lx.dit vernam Guy van dampyere, ende maecte fynanchie ende stelde hem vp ende trac bi sinte Lodewijck in Barbarye ende in Egypten, ende te Massore int lant der Moorianen, ende daer wordt hi rudder ghemaect. Ende vrauwe Margriete regierde binnen deser tijt beede die landen Vlaendren ende Henegauwe. Ende Guy van Dampyere dede daer vele vrome feyten van wapenen vp die Sarasinen, dyt ghedaen sijnde, ende thuys gecomen sijnde, so starf tsaduocaets dochtere van Bethumen sijn wijf, bi wien hy hadde ghehadt Robrecht van Bethunen die Meinfroot doodt slouch ende Coradijn in Appoelgen, ende Willem here van Neuele, Boudin dye goedertiere. Ian bisschop van Ludeke ende Phelips graue van Tyette, ende hi hadder ooc by viere dochteren alle grote princessen ende edelicken gehuwet, daer naer nam hy weder in huwelijcke te wijue des grauen dochtere van Lutsenburch, ende hi hadder mede dat Graefschip van Namen, ende si drouch hem drie sonen ende drie dochteren, al dye wijle dat sijn moeder noch leuende vrauwe Margriete, ende si regierde die landen Vlaendren ende Henegauwe, die spacie ende tijden van xxxiij.iaren, si hadde oock ghedaen stichten vele cloestren ende gods huysen, ter bede van Iehanne harer sustre. Item so wat van transpoorten van allen rechten ende vander demeynen ouer schieten soude in Vlaendren, ende in Henegauwe, dat si dat legghen soude aen die voorseyde cloosters, ende aen diuersche gods huysen. Ende dat si hier mede maken soude dese naer volgende Cloosters. Eerst tcloostere van soetendale, dat Nonnen cloostre van oost eeclo, Doornizeele, ende vele andere tempelen ende gods huysen, dye kercke ten predicaers te Brugge, die Carmers, die freremineurs, die kercke ten wijngaerde, datmen heet tbeghijn hof, der predecaren conuent te Rijssele,

[fol. xli.r]

ende die beghijnen te Ghendt, te Duway, te Valenchyenes, ende te Berghen, ende dat hospitael te Berghen, te Ysendijcke, te Oostburch, die beghijnen Tardenburch, ende dat hospitael vanden Damme, te Thielt, te Torrout, ende in meer ander plaetsen. Ende naer die doot van Margrieten, so wort si begrauen in tcloostre te Flijnez, ende haer deuote dochtere die Abdesse hadde haer daer doen gheuen al huere heylighe Sacramenten, ende daer ouerleedt si, ende wierdt daer begrauen, als voorseyde is. Int iaer ons heren.M.CC.ende lxxviij. Naer die doot van margrieten, so wort Boudin haren houdtsten bastaert sone graue van Henegauwe, ende hy gaf Ian sinen bastaerden broedere die heerschappye van Auennes, ende Guy van Dampyere haren wettelicken sone worde graue van Vlaenderen.