Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Robrecht van Nyueers dye xxiiij.Graue, die welcke in sine jonge daghen verslouch twee groote vianden der helegher kercken in Truckyen.

¶ Dat.xxx.capitel

RObrecht van Nyueers des grauen Guyts houdtste sone was dye.xxiiij.graue in Vlaendren, in sine ionge daghen was hi in Apoelgen inden groten wijch, ende verslouch daer.ij.grote vianden vander heleger kercken Meinfroot ende ooc Coradijn, ende om sine vrome faiten van wapenen, die coninc van Cecylien gaf hem te wijue sijne eenege dochtere, daer hi bi hadde eenen sone die hiet Kaerle, die welcke starf ionc, te sinen.vij.iaren, ende corts daer naer so starf sijn wijf, ende daer naer nam hi te wijue, dye graefnede van Nyueers, ende hi hadde bi haer.ij.sonen Lodewijc ende Robrecht, ende drie dochteren, deene was vrauwe van couchy, dander die vrauwe van Anyau, ende Machtilt die Hertoginne was van Loreyne, Lodewijc sijn oudtste sone die hadde te wijue die vrauwe van Rethel, ende hadder bi een kint, dat ooc Lodewijc hiet, ende eene dochtere die wijle dat die Graue Robrecht leuede.

¶ Item int iaer.M.iij^c.ende.vij.so waren die Templiers gheuangen, ende ghedestrueirt om sommege dolinghen ende ongeloouicheden die si hilden. Int iaer van.xiij^c.was dat schone conincx pallays te parijs vulmaect, ende vp den hele heleghen Sinxen dach, doen hilt die coninc eene grote tryumphante feeste int voorseyde pallays, ende daer maeckte die coninc Phelips dye schoone, sine drie sonen rudders, Lodewijc, Phelips, ende Kaerle, in dye presencie vanden coninc van Ingelant ende van sinen wijue, die welcke sustere was vanden drie ionhelinghen, ende dochtere vanden voorseyde coninc Phelips, ende dese drie iongelingen waren naer haers vaders doot, alle drie coningen van Vranckerijcke, deen naer den anderen, want si nyet lange deen naer den anderen en leifden, ende storuen alle sonder hoyr.

¶ Item int iaer.xiij^c.ende.xiiij.so starf die coninc.phelips die schone, dye men hiet int walsche Phelippe le bel, ende starf haestelicken sonder sine sacramenten, ende corts daer naer so starf die wreede coninghinne sijn wijf. Ende lodewijc sijn oudtste sone, wart te Riemen coninc gheconsacreirt, ende hi hadde Vlaenderen leedt byden instekene van sijnder moedere.