Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dye Graue Lodewijck van Vlaendren nam te wijue die schoone Margriete, Hertoge Ians van brabant dochter

BInnen der seluer maent, byder procuratie vanden coninc van Vranckerijcke, so nam die graue Lodewijck van Male te wijue die schoone Margriete, des Hertoghen Ians dochter van Brabant, ende die brulocht was ghehouden te Viluoorden in Brabandt, binnen der seluer maent voor sint Ians dach, midsomers, daer omme dat dye Inghelsche seere gram waren, ende die schone ysabeele van Inghelant seer beschaemt, huyten welcken si seyde, dat si die trauwe die si den ionghelinc Lodewijck van Male ghegeuen hadde ende beloeft, ghetrauwelic houden soude, ende nemmermeer gheenen anderen man ouer gheuen, twelck si oock wel hielt, want si bleef maghet, ende en wilde daer naer noeyt huwen. Ende vp alle hooghe ende feestelicke daghen, also langhe als si leefde so drouchse vp hare een mauwe den leeu van Vlaenderen, in teekene dat haer dochte dat si warachtege graefnede vanden lande van Vlaendren was. Ontrent desen tijt, dye Coninck van Vranckerijcke

[fol. lix.v]

compassie hebbende vp die van Calis, die hem lieden seer langhe yeghen den Inghelschen coninc wel ende vromelic ghehouden hadden, hy sandt nederwaert sinen oudtsten sone Ian den Dolphijn, ende den hertoge van normandyen met eenen heercrachte, wel van lx^m. mannen, om sine stede van Calis ontsedt te doene, ende om den coninc edewaert te verdrijuene. Ende Ian den Dolphijn commende te sint Omaers, ende verhorende hoe dat die vlaminghen tcasteel van Ruhout gherooft hadden, ende ter neder gheworpen, ende al dat lant tusschen Arcke ende Bethune gherooft hadden, ende wilden dwinghen den graue Lodewijck omme manschip te doene den Coninck van Inghelandt. Daer omme vandt Ian dye Dolphijn in sijnen raet, metsgaders den Senescael van Vranckerijcke, dattet goet ware dat Ian den Dolphijn, ende Hertoghe van Normandyen, soude blijuen te sinte Omaers.