Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die Hertoghe Phelips van Borgoengien te wijue nam vrau Ysabeele des Conincx Ians dochtere van Poortingale.

[fol. lxxxij.v]

ITem int selue iaer van.xiiij^c.ende xxviij.so was ghemaeckt een huwelick vanden Hertoghe van Borgoengien ende van vrau Ysabeele des conincx Ians dochtere van poortingale, ende die voornoemde Ysabeele quam ter Sluys vp den kersdach, ende daer waren si ondertrauwe ghedaen. Ende ontrent den derthiendach so was die brulocht ghehouden te Brugge met groter tryumphe ende blijschepen. Ende dit es Tincarnacioen van dien in latijnsche woorden eerst, ende daer naer in vlaemsche. Ecce portingalea imuixit secum flandria. Tzwin ter Sluys so si eerst mochte, van poortingale Ysabeele besochte.

¶ Item vp sinte Anthonis dach daer naer waren dye Hertoghe Phelips ende Ysabeele eerlicken te ghendt ontfanghen.

Int iaer.xiiij^c.ende.xxix

¶ Int iaer.xiiij^c.ende.xxix.was te cassele ende in die Casselrye van Cassele grote romoerte onder tghemeente yeghen den baliu van Cassele, want tghemeente rees yeghen den Baliu vp, ende yegen die wet, want de Baliu wilde meerder boeten hebben vanden ghenen die vochten of twisteden yeghen malcanderen dan haerlieder preuilegien, wetten, ende costumen in hilden. Ende om dat heer Colaert vanden Clyte den baliu hemlieden te hardt was ende onghelijc verchde, daer omme stichten si ende wierpen ter nedere sijn casteel ter Ruwerschuere in Casselambocht Ende ooc om dese groote rebellichede dye

[fol. lxxxiij.r]

die Casselaers deden, hem lieden stellende in die wapene, ende stonden te velde om des princhen lieden te beuechtene, so quam dye prinche daer selue in persone, int iaer daer naer vp sinte Anthonis dach met menichte van lieden van wapenen, ende brochtse te sijnder ghenaden, ende hi dede aldaer onthoofden die hoofden ende vpstelders vanden twiste, Aernoudt kyekin ende Iaecx lootin, ende meer andere te Cassele binnen der stede. Ende vp dien dach was gheboren sprinchen eerste sone Anthonis.

¶ Int iaer.xiiij^c.ende.xxix.doe starf Phelips van saintpol hertoghe van Brabandt, van Lotrijcke, van Lymburch, marcgraue des heilichs rijcx, alle welcke heerschepyen quamen toe ende verstoruen den Hertoghe Phelips van Borgoengien sijnen rechtsweere, als sijn naeste hoyr.

¶ Item int selue iaer doen conquesteirde die hertoge Phelips dat graefschap van Namen. Ende aldoe roerden eene oorloghe die van Luydeke yeghen tlandt van Namen, omme den hooghen torren van Bouuyns, staende vp die mase binnen den lande van Namen, welcken torre so hoghe staet datmen van dien torre die lieden sach gaen vp die straten in de stede van Luydeke. Ende die luyckenaers begheerden dien torre ghenedert te hebbene, of si souden den selue commen nederen met crachte, ende raserene ende doen te nyeute. Ende om dat die van Namen dat nyet doen en wilden in gheender manieren, soe quamen die van Luydeke ghewapender hant int landt van Namen roouen, brant stichten, ende die lieden vanghende ende dootslaende, ende dedent so vele te meer, omme dat si noch spijt hadden dat die Hertoghe Ian van Borgoengien des Hertoghen hadde voor Luydeke van hueren volcke bet dan.xx.duysent mannen, ende dat sijn sone Hertoghe Phelips hemlieden so naer quam, ende meenden alsoe onder tdecsele van deser oorloghe altemet te wreken haerlieder toorne, ende bedecten nijt die si hadden vp den hertoghe Phelips, want het speet hem lieden seere dat hi graue van Namen was. Dye Hertoghe Phelips verhoorende die schade die dye luyckenaers ghedaen hadden in tgraefschip van Namen, twelc sijn lant was, hi versaemde veil volcx van wapenen, pycaerden, ende vlaminghen, ende sandtse in tlant van Luydeke daer si vele quaets deden, ende vele lants bedoruen ende destrueirden.

[Int iaer.xiiij^c.ende.xxx]

¶ Ende ontrent sint Ians dach midtsomers, int iaer.xiiij^c.ende.xxx.soe daden onse lieden een sprincreyse yeghen die luyckenaers, ende daer bleef versleghen heer Ian van Ghistele, here van dudtzeele.

¶ Item binnen dien seluen iare was die maecht'die metten dolphijn Kaerle plach te rijdene ghewapent, buyten Parijs gheuanghen, ende gheuoert te Rouwaen in Normandyen, ende was daer verbarnt aen eenen stake.

[Int selue iaer van.xiiij^c.ende.xxx]

¶ In die maent van Meye vp den Sacraments auent int selue iaer van.xiiij^c.ende.xxx.Die coninck Heyndric van Inghelant een ionc kint van.vij.iaren, commende duer Normandyen tot Parijs, was vp den derden sondach inden Aduent te parijs in onser vrauwen kercke ghecroont coninck van Vranckerijcke. Aldus waren doe in Vranckerijcke twee Coninghen, Kaerle die gheconsacreirt was te Ryemen, ende Heyndrick die te Parijs was ghecroont.

¶ In dit selue iaer was eene grote beroerte binnen der stede van Gheertsberghe, omme dat die wet vercocht hadden lijfrente vp die stede, tghemeente wasser yeghen, ende si en wilden nyet ghedooghen datmen die brieuen beseghelen soude. Ende si wilden der stede seghele van verbonde hebben met crachte, ende dien te nyeuten doen, ende casseren. Die wet van Gheerdtsberghe lietent weten die heeren vanden rade te Ghendt. Dye heeren vander stede van ghendt ontboden die Baliu die punyeren soude naer dye gheleghentheyt vander mesdaet. Mer Ghelein van halewijn, die doe baliu was deder vele onthoofden, ende daer mede cesseirdet, ende dye hoofden dede hy stellen vp die poorten vander stede.

[Int iaer ons heren.xiiij^c.ende.xxxij]

¶ Int iaer ons heren.xiiij^c.ende.xxxij.in landt van Vlaendren was eene grote beroerte, omme die nyeuwe munte. Die heren stelden voort, in vlaendren, ende wilden heyndelijcken, dat men aen tgout verliesen soude den derden penninc, ende datmen aen tselueren ghelt verliesen soude den vierden penninc, ende

[fol. lxxxiij.v]

hier was tghemeente yegen, want si en wilden soe vele niet verliesen, maer si consenteirden wel te verliesene den.vi.penninc, maer anders niet. Ende hier omme so liep volc te ghendt in die wapene, ende die weuers lieten haer werc staen. Ende aldus in die wapen staende, so seyden si dat si wilden gaen soucken die vpstelders van desen. Ende daer sloughen sy doot den voorschepene van Ghendt Daniel van zeuerne, den ouerdekene van boele, ende Ioos hazebijt, ende doe ghinghen si soucken meester Heyndrick huyten houe, den thoonre van Gendt, ende Ian die graue, die welcke si niet thuys en vonden, maer waren ghevloden huyt ghendt. Doen ghinghen sy breken haerlieder huysen, ende namen haerlieder goet. Dit gheuiel in Ougst vp Sinte Claren dach, Dit es tincarnatioen van dyen In Ougst vp sinte claren dach, te Ghendt men vele rauwen sach.

[Int iaer.xiiij^c.ende xxxiiij]

¶ Int iaer.xiiij^c.ende xxxiiij.te ghendt waren sommege vulders die beroerte ghemaect hadden onder tvolc yeghen die wethouders, ende waren in wille om brandt te stichtene in die vier houcken vander stede van ghendt. Men warts gheware, ende si waren ghecreghen, ende voor paesschen vp den schortel woensdach waren si onthooft.