Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe de Hertoginne van Bourgoengien orlof nam, aen den coninck van Vranckerijcke, sijnde te Aloen, binnen der Stede.

KAerle coninc van Vranckerijcke int beghintsel vanden iare sijnde te Aloen, daer hi hadde gehouden sinen paesschen int hof ende hospitael vanden seluen bisschop vander stede van Aloen. Ende tes te wetene dat hy houdende was grooten rijpen raet, vp beede die begheerten, die welcke die hertoghinne van Borgoengien aen hem ghedaen hadde, ende dye van haren rade waren. Ende ten eynde van haren rade finalicke, huer was lettel of niet gheconsenteirt van huere begheerte, omme twelcke si onpacientich ende qualijc te vreden was, en de vernam wel, soe dede ooc mede hueren raet, dat dye Gouuernuers vanden Coninck niet wel in gracien en hadden den voorseyde Hertoghe van Bourgoengien haren man, noch sijne ghewercken. Ende

[fol. C.xij.r]

omme dat si sach, al hadde si daer lange ghebleuen, ten hadde haer niet vele gheprofiteirt. Aldus soe nam si oorlof aen den Coninc corts daer naer, ende bedancte hem seer van sijnder minlicker ontfanghinghe, dye hy huer ghedaen hadde. Ende daer naer soe seyde si. Mijn heere van alle die beden ende gheerten die ic aen hu ghedaen hebbe, ne gheen van al en hebdi mi gheconsenteirt, naer mijn aduijs, die welck waren nochtans redelick.

¶ Vp twelcke die Coninck verantwoorde segghende, schoon sustere dat es ons leedt want andersins en macht nyet wesen, want wijt also vinden in onsen raet, vp twelcke wi hebben sprake ghehadt te diueerschen stonden, want huwe begheerte soude ons commen tot alte groten grieue, daer inne te consenteirene. Ende naer dese woorden so nam si orlof als voren verhaelt es, aen den coninc, ende ooc aen sinen sone den Dolphijn, ende schiet van danen, ende quam van daer logieren te Sinte Quintens met al hueren state. Ende in sghelijcx als te voren so gheleeddese dye edele Graue van Rijtsemont conincstable vanden coninc van Vranckerijcke wel een grote mijle varre met noch vele andere grote heren. Ende sy ghinck haer maeltijt houden in tcasteel van camersijs Ende vp die huere ende tijt so waren eenege van sconincx volcke ghegaen roouen ende pilgieren in tlant van Henegauwe, ende in die maertse daer ontrent, ende si leedden mede een groote menichte van peerden, coeyen, ende andere beesten, ende vytalie ende ander goet. Ende si waren lichtlic achterhaelt vanden lieden vander Hertoghinne, die welcke van dien versloughen.v.of.vi.persoonen. Ende eeneghe salueirden hem bi foortsen van wech te lopene, huyt ghesteken twee, die achterhaelt waren, ende gheuanghen ghebrocht te Kennoyt, daer die hertoghinne van Borgoengien quam logieren. Ende daer van si den hertoghe Phelips haren man, ende daer was si hem verhalende al tghene dat sy hadde gheuonden aen den Coninck, ende aen sinen raet. Ende voorwaer al dye meeste menichte vanden edelen dye met haer hadden gheweist int voorseyde voyaedge en waren niet alsoe goet fransch in haerlieder wederkeeren, als sy waren int daerwaerts trecken, omme eeneghe woorden ende manieren dye si saghen ende hoorden in haerlieder scheeden.

¶ Item mijn gheduchte Hertoghe van Bourgoengien peynsende omme die voorseyde ouerbringhen, ende aensiende met eeneghe van sijnen naesten rade, dat hem wel van noode was hem ende sine landen te hoedene, versekert, ende wel bewaert van lieden van wapenen, ouerghemerct dat met cleenen occusoene die fransoysen souden gheringhe gheneghen sijn, omme hem te doene grief ende schade. Nyet te min, daer waren altijt tusschen dese twee partyen vaeliante ende wijse eerbare mannen, dye altoos begheerden ende middele sochten omme dese twee heeren te houdene in paeyse ende in eendrachticheden, ende specialicken van sconincx sijde. Ende die bisschop van Ryemen was seere gheneghen altoos omme ten besten te sprekene. Ende als die Hertoghinne, als bouen verhaelt es van danen was vertrocken, soe waren altoos van daghe te daghe eeneghe vanden heeren gaende ende keerende vander eender partye of vander ander, tusschen beeden, die altoos huyt waren omme accoort tonderhoudene, ende daden al dat wel ghedaen mochte sijn tusschen hem beeden, omme paeys, minne ende eendrachticheyt te houdene.