Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dye Graue van Stampes, track in Bourgoengien bi den Hertoghe Phelips, omme hem te vermanene te trecken int Thertoochdom van Lutcenburch.

¶ Dat.xxxix.Capittel.

ITem in tvoorseyde iaer die Hertoghinne van Lutcenburch, die tanderen tijden hadde ghetraut Anthonis van Brabant, ende den hertoghe Ian van Beyeren, beede ouerleden ende doot, ende die ooc ooms waren, deene vander vaderlicke side, ende dander vander moederlicke side, vanden Hertoghe Phelips van Bourgoengien dede seere groote clachte, aen den seluen hertoghe van haren lieden ende ondersaten vanden seluen Hertoochdom van Lutcenburch, omme dat si niet obedieren en

[fol. C.xiij.v]

wilden ende huer betalen van hueren Renten, ende demeynen, ende specialijc die van lutcenburch, ende die van Tyonvyle ende van andere plaetsen daer omtrent, die welcke hem lieden hadden gemaect Rebel ende desobedient haer lieder Hertoghinne. Ende si versochte ende badt seere ootmoedelicke, ende omme die eere van sinen ooms, die si ghehadt hadde in huwelicke, daer sy haer mede ghedreghen hadde seere eerbaerlicke, dat hy haer wilde helpen ende bijstaen, soe datse wierde gheobedieert ende ghestelt in huere heerschepye, of andersins si soude moeten bedwonghen leuen in groter armoede ende keytiuichede. Ende die hertoghinne was verandtwordt vanden Hertoghe phelips vriendelic ende minnelicke. Ende hi beloofde sijnder moeye die hertoghinne met goeder herten te helpen yeghens die van Lutcenburch, bi allen weghen ende middelen van redene, also varre als hi goelicx mochte, van den welcken hem dye Hertoghine seere bedanckede.