¶ Dat.xlv.Capittel.
ITem in tselue iaer van.lvi.als die Hertoge Phelips voor Deuenter lach, vp dien seluen tijt soe vloot dye Dolphijn huyt Vranckerijcke, ende quam in Vlaendren om hem te berghene onder den hertoghe Phelips van sijns vaders aensichte. Ende dye Hertoghe Phelips noch ligghende voor Deuenter ende vernemende die comste van sconincx sone van Vranckerijcke, hy vouchde hem seluen omme pays te makene ende te vertreckene van voor Deuenter, ende hy quam te Vlaender waert omme den voorseyde Dolphijn eerlicken te ontfanghene, alsoe hi dede. Ende hi brochte den seluen Dolphijn gheheeten Lodewijck de Valois binnen der stede van Brugghe, daer hy weerdelicken ontfanghen was met groter triumphe, daer die wet van Brugghe die poorterye, ende alle die ambochten stonden met schonen state vander bouuerye poorte tot mijns heren houe, ende ghestoffeirt met schonen barnende toortsen, elck in tsijne daer oock onder weghe schoone tooghen ghedaen waren, seere rijckelic ende vele.
¶ Item dese voorseyde Dolphijn hadde te wijue des Hertoghen dochter van Sauoyen, die welcke vrauwe corts daer naer ghelach te Geneppe van een ionghen sone, ende was ghenaemt Ioachim, maer hi starf ionck.
¶ Item die hertoghe Phelips van Borgoengien die onderhilt desen voorseyde Dolphijn ende al dat hem aencleefde wel.v.iaren lanck, grotelic te sinen coste. Ende hi dede hem groot reuerencie, want altijt reedt hi beneden hem, ende bloots hoofts, ende dese voorseyde Dolphijn was binnen Brugge vp den heleghen bloet dach, ende om sijnen wille was gheordonneirt eene seer schone ende excellente processie van spelen, ende van alle chierlichede, meer danse binnen vele iaren daer te voren gheweest hadde. Ende alle die costelicke iuweelen vanden selueren cruycen ende trompetten, ende andere, als coppen ende cannen den ambochten ende neeringhen toegehorende, waren alle mede ghedreghen ter verchiertheyt vander seluer processie, in twelcke die Dolphijn seere verwonderde, hoe dat sulcke rijcdom binnen der stede van Brugghe wesen mochte. Ende desen voorseyde helich bloetdach was int iaer.M.iiijc.ende.lvij. Ende binnen deser tijt so reedt dye Dolphijn allomme tlandt van Vlaendren wel besiende, daer ons achter naer lettel duechden of quam.
¶ Item als dese voorseyde Dolphijn.v.iaer lanc gheschuylt hadde onder den Hertoghe Phelips, doe starf coninck Kaerle van Vranckerijcke sinen vader, diemen hiet Kaerle die goedertiere. Ende als hertoge Phelips dat verhoorde, so vergaderde hi groote macht van heren ende princhen, ende andere edelen, ende hy trac metten Dolphijn in Vranckerijcke, ende dede hem daer crooneren geweldich.coninc.van vranckerijcke, waer of hier volcht tincarnacioen.
Menschen pijnt gode dancbaer te sijne
Commen es ons so soete een tijt
Couuere van coorne en vulte van wijne
Clare somer en drooghe om ons profijt
Coninck ghecroont net sonder strijt
Leift nv lodewijck in Vranckerijcke
Xpristus moets wesen ghebenedijt
In vele iaren en was dies ghelijcke.
¶ Item binnen den iare.lxi.lxij.lxiij.so was die Hertoghe Phelips besoengierende metten voorseyde saken, ende en was gheene oorloghe hanthierende, maer bleef hier int landt.
Auteursrechtvrij