Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Een recommendacie vanden Hertoghe Phelips van Borgoengien naer sijn ouerlijden ter weerdicheden van hem.

¶ Dat.L.Capittel.

PHelips van Valoys here van Chaerloys Hertoghe Ian van Dygioens sone, was dye.xxx.graue van Vlaendren, hi was hertoghe van Borgoengien, van Brabant, van Lotrijcke, van Lymburch, ende van Lutcenborch, Graue van Vlaendren van Artois van Borgoengien van Hollant, van Zeelandt, Graue van Namen, ende van Henegauwe, heere van Vryeslant, Palatijn Marcgraue des helich rijcx, heere van Salijnes, ende heere van Mechelen. Hi was oock die moghenste Prinche vander weerelt in sijnen tijden, die vermaerste, die ontsientste, die ghemintste, ende die rijcste, die amorueste, die wijste, dye mildtste, die eerbaerste, die alder vriendelijcste, ende dye ontfaermichste, ende die schoonste prinche die men in kerstenheyt vinden mocht. Ende hi

[fol. C.xxx.v]

dwanc met vromicheden ende met wijsheden al sine vianden hoe sterck dat si waren, ende hoe rebel, als Dordrecht, Ghendt, Brugghe, Deuenter, Vtrecht, ende alle tlant van Lutcenburch, ende meer andere. Ende noyt Prinche en hilt soe langhe sijne landen in paeyse ende rusten, als hi dede. Hy was out als hy starf ontrent.lxxi.iaer, hy regierde tlant van Vlaendren.xlviij.iaer.xi.weken min. Met goede moet hy rusten in vreden Amen.