Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volghen die Figuren.

EErst aen den houc vander kerseboomstrate tot den.iij.muenickendweers ouer die strate, was ghetemmert eene rijckelijcke poorte daermen onder duere leedt. Ende vp diese poorte stont eenen torre, daer inne dat stont een schoon lustich parck, gheconterfaeyt naer teerdtsche paradijs, daer in ghetoocht was van leuende personen Adam ende Eua. Ende daer voren stont ghescreuen. Dominus deus in paradiso voluptatis adduxit euam et adam vt vxor et coniunx ipsius esset. Ende Adam dye hadde een rolle in dye hant segghende aldus. Hoc nunc os, ex ossibus meis, et caro de carne mea. Ende onse here hadde een rolle, seggende aldus. Crescite et multiplicamini et replete terram, welck parck hadden ghedaen maken dye vier neeringhen.

¶ Item aen thuys vanden wouckere wijlent toe behoorende Ioos Hoonin tot aenden muer vanden Iacopijnen, tseghen ouer was ooc ghemaect eene poorte dweers ter strate, met hooghen torren vpwaert gaende, daermen bouen seer meesterlick vp speelde metter orghele, in welcken torre bouen ghesloten waren vele witte duuen, ende ander manieren van voghelkins, die welcke hangende hadden aen haren hals, die wapene van den Prinche ende vander Bruyt. Ende als die bruydt quam voor die voorseyde poorte, so liet men alle die voghelkins vlieghen, die welcke som beeten vp huere waghens, daer dat volck grote blijschap in hadde, ende sommeghe andere vloghen wech int wilde, verre van Brugghe, twelc vreimdt om sien was daer si quamen. Ende aen elcke syde van deser poorte stont eene figure, die welcke was te Brulocht, hoe dat dye Coninck Alexander traude die dochtere vanden Coninc Tholomeus, ghenaemt Cleopatra, Ende daer stont ghescreuen. Rex Tholomeus Tholomaida venit, et Cleopatram eius filiam Alexandro regi in vxorem dedit. Ende een Prophete stont aenden seluen torre houdende in sijn hant een Rolle, waer inne stont ghescreuen. Gaudeamus et exultemus: et demus gloriam deo quia venerunt nuptie agni, et vxor eius preparauit se. Ende aenden west voet vander muelen brugghe stont noch een schoone poorte, daer vp dat een blijde parc stont, ende daer een fonteyne binnen, ende een suuerlicke maecht ghecleet als een bruyt, met meer maechdekins die byder fonteyne stonden, ende dye bruyt hadde in huer hant een rolle daer in dat stont ghescreuen. Filie nuncia to dilecto meo, quia amore langueo. Ende aen dander sijde vander fonteyne stont een

[fol. C.xxxviij.r]

suuerlic ionghelinc, als eenen bruydegom, met meer ionghelinghen, ende hi hilt een rolle in sijn hant daer in dat stont ghescreuen. Vulnerasti cor meum sponsa mea, et letificasti animam meam. Ende dit voorseyde parc deden maken die vleeschauwers ende die vischcopers