Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Die poorterye.

¶ Item yeghens thuytcommen vander breydelstrate, aen den houck vander ouder halle daer stont een rijckelic parck, daer in dat sadt een huytnemende schone maecht, seere costelick ghehabitueirt, met rijckelicke yeweelen vp het hooft, ende aen hueren hals, ende si hadde hanghende bouen hueren hoofde een lelye van goude, ende vp hueren schoot laghen eenen Leeu ende eenen Lupaert, ghelijc of si malcanderen ghecust hadden, ende daer stont ghescreuen in gulden letteren. Leo et pardus in gremio flosculi se amplexi sunt sub lilio. Ende tes te wetene, dat achter den Leeu die swart was, ende beteekende tgraefschip van Vlaendren, lach ooc eenen gouden Leeu, die welcke beteekende thertochdom van Brabant, ende achter dyen lach eenen rooden Leeu, ende dye beteekende Lutcenburch, ende achter den Lupaert van Inghelandt lach den gouden Leeu van Aquitantien, ende den gouden Leeu van Normandyen, welcke Leeuwen alle costelijck ghestoffeirt waren van goude ende van seluere, ende costelicke schilderye. Ende aen elc eynde vanden parcke stont eene rijckelicke vrauwe, deene metter wapenen van Vlaendren, ende dandere metter wapene vander stede van Brugghe, welcke vrauwen hadden elck eenen bouck in die hant, daer in ghemaect was een hert duerschoten, ende aen dander sijde eene gulden croone. Ende dat presenterende der yeghenwoordigher bruyt. Ende dit voorseyde parck was binnen al verschildert wit ende blaeu.

[fol. C.xxxviij.v]

¶ Item die Oude [halle was] al behanghen van boven tot beneden, [met nyeuwen] laken roodt, wit, ende blaeu. Ende [in die vooye] vander nyeuwer halle, waren blijdelic gheblasen, alle die selueren trompetten ende claroenen, in die yegenwoordicheyt vander voorseyde bruyt