Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Brugghe bidt Gode om vrede,

B uucht huwe knyen voucht v oodtmoedli ¶
R edelicke menschen aensiet hoe gloedli ¶
V enijnde oorloghe nv toocht haer wer ¶      ♠
G ruwelicke vreese met tanden bloedeli ¶
G henaect ons allen o god hoe vroedeli ¶
H y dede die paeysde die wreetheyt ster ¶      ♠
E lck voughe hem biddick dan leec ende cler ¶
B edijnghe te tooghene deuoot ende wijseli ¶      ☩
I eghenwoordich es in ons ooghemer ¶
D ruck, schade, vreese, verdriet, afgrijseli ¶
G rief van edelen es nv vprijseli ¶
O ntheruijnghe van princhen droefheyts gheque L
D yeren tijdt, sterfte, brandt, moordt, mespriseli ¶
E xactie, ontscakijnghe, destructie fe L
O m twelcke men in processye sne L
M etten heleghen bloede gheweest hieft n V      ♣
V p sinte Amandts dach sinte claren we L
R oupende aen gode voor dit ghesce L
E nde voor der vyanden verradelic gr V      ♠
D us biddic hu hoort mijn gheslee V
E ene deuote bede, behouft nv den lee V

Vi. in Sporkelle processien waren      ☩      ♣

Metten heleghen bloede tsinte Claren

Anno.M.CCCC.lxx.

VP desen seluen tijdt wordt dye Coninc murmurerende vp den Graue van Simpol, ende sloot in sinen raedt den voorseyde Graue te doodene met Fenijne, of andersins, so varre dat een die vanden rade was vanden coninc, die gaf den Graue van Simpol te kennene, dies quam die Graue van Simpol claerlic bi den coninc, waer of dat die coninc hem verwonderde. Ende hi scheldende seyde ghi sijt conincstable, ende ghi hebt my eedt ghedaen, maer lettel hebdy mi gheuordert in mijn eyghenwoordeghe Armeye. Waer vp die graue van Simpol antwoorde gaf, hoe dat hi beloeft ende ghesworen hadde, ende besegelt, nemmermeer te vechtene yegens sijnen neue den Hertoghe Kaerle van Bourgoengien, iae emmer binnen die frontieren van sinen landen, maer quame hi diepere in Vranckerijcke, hy soudene helpen keeren ende wederstaen. Ende met desen woorden was die coninc weltevreden, ende hy gaf den Graue van simpol last alle die steden vander somme in te halen, in dyen hy mochte, om twelcke die Conincstable in nam sinte Quintins, Pyrone, Mondedier, roye, ende meer andere.

¶ Omtrent desen tijt eeneghe vander stede van Amyens, ontsaghen den hertoghe kaerle, ende si vertrocken altemet huyter stede. Ende eenege sonden aen den Hertoghe Kaerle, oft hem gheliefde met sijnen huysghesinne Tamyens binnen te commene, si souden hem gheerne ontfanghen. Twelcke Hertoghe kaerle seer qualic keerde, ende duchtede ende vreesde also verraden ende bedroghen te worden.

[fol. C.lx.r]

¶ Item dye stede van Abbeuijle begonste ooc te wentelene, maer mijn here van Crieuecuer deder eene den hals of hauwen, ende hi verbarnde dat voorbouch van Abbeuijle, ende bleef gheweldich capiteyn vander stede van Abbeuijle huyter name vanden Hertoghe Kaerle.

[Den.xij.sten dach van Sporcle]

¶ Item die hertoghe Kaerle trac in desen tijt ontrent.ij.mijlen buyten Atrecht in een groot pleyn, ende daer slouch hi te velde. Ende men gaf dat velt den name le champs de honneur, gheseyt het velt van eeren, als of hi segghen wilde huyter wapene nemmermeer te scheedene, voor hy sijn groote onrecht ghewroken soude hebben. Ende dit selue parc of velt was sterckelic bedoluen, ende met grooter menichte van carijnwaghenen ommestelt, deene in dander gheuoucht. Ende dit was ontrent den.xij.sten dach van Sporcle Anno.lxx.daer hem ontallicke menichte van volcke te baten quam.

¶ Item mijn here van Remy, sone van mijn heere van Croy quam huyt Henegauwe vp den seluen tijt, met vele volcx van wapenen, daer hi seer wel ontfanghen was vanden Hertoghe van Bourgoengien, maer die voorseyde heere van Remy vertrac heymelic aen sconincx sijde, dies hy ooc gherekent es in thuys van Bourgoengien voor een van sijn contraryen, omme die grote vreese diemen vprijsen sach van die wentelijnghe vanden heeren, ende hi gaf hem lieden kuere, want hi gheen vreese daer inne en maecte, maer hy soudt wel ghedijncken vp een ander tijt.

¶ Item doe was te Brugghe ghedreghen processye generael, ter Magdalenen buyten Brugge, om te biddene omme paeys ende voort om ghetijdich wedere.

¶ In sporcle sesthiene bi orloochs quale
was ter Magdalene processye generale

¶ Vp den seluen tijt quamen viere ghesellen, ghecleet of si scholieren gheweist hadden, ende sy draeyden altoos ontrent des Hertoghen artijlgerye omme tvier in des Hertoghen buspoer te worpene, maer men wordes gheware. Ende die twee vanden vieren waren ghehanghen metten hoofde nederwaert, maer dander.ij.ontliepen.

¶ Item dye Hertoghe van Gheldre, ende sijn sone die ionghe Hertoghe, dye waren ooc in tvoorseyde velt, byden Hertoghe Kaerle, maer die ionghe here van Gheldre trac heymelic huyten velde, ende reedt wel.xxx.mijlen sonder vphouden, so varre dat hy te Namen gherochte, daer hi voor die poorte gheuanghen was van die vanden aweette, ende hy was gheuoert te Rijssele int casteel, als een vluchtich ende onbekend Ruddere, ghelijc als daer wel bleeck.

[Int selue iaer van.lxx.]

¶ Item int selue iaer van.lxx.doe veranderde Hertoghe Kaerle het steickspel van Rijssele, twelc daer te voren altijt gheleghen hadde vp den grooten vastenauent, ende dat dede hi verlegghen vp den papen vastenauent, omme dat die voorseyde prinche nyet en wilde datmen den heleghen tijt vander vastene soude belemmeren met sulcke weerlicke saken.

[Anno.lxx.vi.in Maerte]

¶ Item in desen tijt track Hertoghe kaerle wat naerder der stede van Amyens. Ende daer worde hem seere rebel eene stede, ghenaemt Pykengy, met haren casteele, voor welcke stede hi viel met grooter moghentheyt, winnende die selue stede metten sweerde. Ende hy deidse vellen ende al gheheel destrueren. Ende men verhoorde nyeumare, dat die hertoghe Kaerle siedge soude slaen voor die stede van Amyens, dies drouchmen processye generale te Brugghe, tot onser vrauwen broeders.anno.lxx.vi.in Maerte.

Tonseyde vrauwen broeders duer karels weluaerte
was lieuelic processie nv.vi.in maerte.

[Den.x.sten dach inde Maerte]

¶ Item int selue iaer den.x.sten dach inde Maerte doe was Sinte Bonefacius met sijne ghesellen verleyt in eenen nyeuwen fiertre, byder hant vanden Bisschop van Sareyten, dye welcke tofficie dede. Ende daer waren.vi.Abten yeghenwoordich, ende andere Rudders ende heeren vp een staedgie, daer toe gheordonneirt voor den docsael, in onser vrouwen kercke binnen der stede van Brugghe.

Ic sach verfierteren met blijden gheschiene
Sinte Bonefacius in maerte thiene.