Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dat die Keyser hem seluen toochde in Keyserlicken state.

Item naer dit voorseyde faeyt van wapenen ofte tornoy, ende naer vele raets dye dese voorseyde twee heren te samen hadden, so muechdy hier ooc wat lesen vanden state vanden Keyser, want te Triere vp die marct daer waren tvleeschuys ende tbroothuys of ghebroken, ende van dien ghemaect een grote wijde plaetse, vp welcke plaetse was gemaect een groot stercke stellaedgie, die ghetemmert was groot, breet, ende wijt. Ende daer vp eenen schonen groten stoel ghestelt, omme den keyser inne te sittene, als behanghen met schonen gulden lakene, bouen, beneden, ende aen beeden sijden.

[Vp den.vi.sten dach van Nouembre]

¶ Item vp den.vi.sten dach van Nouembre quam die keyser met sijnen cooruorsters lancx der strate, ende hi hadde een alue aen met eender stoole, ghelijc een dyaken, ende daer ouer een costelicke cappe, ende sijn sandalien waren beneden aen sijn voeten.

¶ Item mijn heere van Mens eerdtsch Cancelier ouer Germanien die leedde den keyser ouer deen sijde. Hi hadde ouer sijn alue eenen rooden mantel gheuoedert met ermynen, ende sghelijcx ooc alsoe een cappe vp sijn hooft, een almisse dobbel vp ghesleghen, gheuoedert met ermijnen seer rijckelic ende costelick.

¶ Item in deser manieren daer naer so ghinc mijn here van Triere voor den Keyser, als eerdtsch cancelier ouer Gabiaen lant, ende hi drouch erulaten, ende des keysers Tyara dat van goude was, daer meneghen costelicken ende dierbaren steen aen stont.

¶ Item mijn here van Colen als een eerdtsch Cancelier ouer Italyen, hy en was daer niet, maer een eerdtsbisschop in Oostenrijck, des keysers sone Maximiliaen, die ghinc in sijnde stede. Ende hi leedde den keyser ouer dander sijde sonder alue, maer hadde aen eenen rooden mantele, ende vp sijn hooft haddy een aelmisse, gheuoedert met Ermijnen, vp gheslegen. Ende daer inden middele stont ghesneden die maniere van eender crone, ende daer vp die weerelt van goude, in ghelijckenisse van een Dyademe.

¶ Item een palsgraue Eerdtsch drossate van den Rijne, die die gulden weerelt voor den keyser te draghen pleicht, dye en was daer nyet, maer in sijn stede drouch hertoghe Lodewijc van Beyeren den gulden appel.

¶ Item dye Hertoghe van Zassen Eerdtsch Marscalck des Roomschen rijcx, en was daer ooc niet, maer mer Adolf van bappren drouch in sijn stede tsweert voor den keyser

[fol. C.lxx.v]

¶ Item die coninc van Bemen Archyschincker en was daer niet, noch en santer nyement in sijn stede, twelck den keyser wonder gaf.

¶ Item die marcgraue van brandenburch die en wasser oock niet, maer sijn sone drouch in sijn stede den scepter voor den keyser. Ende doe ghinc die keyser sitten vp sinen eerlicken stoel met sinen Tyara vp sijn hooft, ende sijn cooruorsters saten neffens hem daer dye trompetten ende claroenen grote melodye maeckten. Ende doe so sachmen daer commen rijdende die here van Egmont met eenen rijnwimpele in sijn hant, al root van coluere. Ende hi ende die sijne reden met grooter ghenouchten onder dye stellaedgie, ende daer voren.

¶ Item die graue van Zalmen, ende mijn heere Anthonis dye bastaert van Bourgoengien, die reden daer van ghelijcken.

¶ Item daer naer quam ghereden ioncker Frederic van Egmont met eender baniere in sijn hant, wesende tvelt van asure, ende daer in eenen claeuwenden leeu van goude.

¶ Item doe quammer ooc ghereden Ooswal van Berghen met eender baniere van seluere in sijn hant, ende daer in staende eenen rooden leeu claeuwende.

¶ Item doe quamen die trompetten met gheluyde. Ende met schoonen state quam die Hertoghe van Bourgoengien, met eenen peersschen fluweelen mantele aen, gheuoedert met ermijnen, ende daer ouer een cappe ghelijc een prinche vanden roomschen rijcke, ende vp sijn hooft een swart bonnet, ende daer vp een coronael van goude, daer meneghen costelicken steen aen stont. Ende hy sadt van sinen peerde, ende bouen vp dye stellaedgie commende, knyelde neder voor den Keyser met rudderlicken state.

¶ Voort quam des hertoghen raet van Berghen, ende des hertoghen raet van Ghulic, als machtich ouer beede die Hertoghen, van Ghulic ende van Berghen. Ende kenden ende verleden voor den Keyser, ende ghinghen te buyten al dat recht ende die aensprake die si beede hebben vp het hertochdom van Gheldre, ende het graefscip van Zutphen. Maer renuncierdent ende gauent ouere inden handen van den Hertoghe van Bourgoengien, die welcke daer bereet stont omme dat te ontfanghen met groter weerdicheyt, ende knyelde voor den keyser, ende leyde sinen vinghere vp tcruyce van skeysers sweert, ende dede daer sijnen eedt, ende beloefde te wesene goet ende ghetrauwe voor skeysers rijcke van Roome. Doen quam die Keyser ende hief den hertoghe vriendelicken vp, ende gaf hem die banniere in sijn hant, ende noemdene Hertoge van Gheldre ende graue van Zutphen. Nv es hi gheweldich here van Gheldre ende van Zutphen, God verleene hem dat hijt paeyselic besitten ende ghebruycken mach.

¶ In desen seluen tijt was by Ghendt gheboren een kint, een meyskin sijnde wiens aermen, beenen ende buyc also groot ende dicke waren als een redelic mensche es, maer sijn handekins ende voetkins waren also cleyn als sulcke kinderkins pleghen.

[In tselue iaer van.lxxiiij]

¶ Item in tselue iaer van.lxxiiij.doe was al tkerckelicke goet gheamortiseirt van cane zien, prochyekercken, abdyen, ende cloosters, mendicamenten al Vlaendren duere, ende Brabant duere, ende Hollant ende Zeelant, van alle den goedinghen die si binnen.lx.iaren vercouuereirt hadden, ende si moesten gheuen den pacht van drie iaren vanden seluen goedinghen dwelc groot goet bedrouch, ende onnoemlicke schat.

¶ Item vp den seluen tijt waren grote schattinghen ghestelt in tlant van Vlaendren, als kaliote vp alle maniere van goede.

[In dit selue iaer vp sinte Anthonis dach]

¶ In dit selue iaer so was te Brugge onthooft een metsenaers knape, vp sinte Anthonis dach inden burch, omme dat hi gheuloden was huyten heyre voor Nanchy, ende dat hi tpungioen vanden pijckeniers wech drouch, of wierp, ende waende also te Brugghe vry te sijn. Maer bi scherpe mandementen vanden Prinche was hi onthooft als voorseyde es.

¶ Int selue iaer was te Ghendt een man ghesonden, om dat hi valsche munte ghesleghen hadde. Ende dese iusticie was ghedaen vp sinte Luycx auent, voor tschepen huys te Ghendt.