VP den.xxv.dach in April so was ghehouden eene dachuaert binnen der stede van Ghendt, van alle dese naeruolgende lande. Te wetene Vlaendren, Brabant, Hollant, Zeelant Henegauwe, Gheldre, Zutphen. Ende die van Oude schelde, als Artoys, Bollonoys Pycaerdye. Ende ooc die drie staten van Vlaendren versamende binnen Ghendt, als voorseyde es. Daer was begheert van sprinchens weghe, eene grote sake, ende vele diueersche pointen. Onder alle andere pointen so wilde hi hebben den.vi.sten penninc van alle der lieder goeden, welcke pointen als doe hem ontseyt waren vp den.xxvi.sten dach van Meye, als den dach vander antwoorde diende.
¶ Item in dit selue iaer was te Brugge een Deken vanden lootghieters, gheheeten Reynout Willems, die versmade vp den dach van den heleghen bloede een root sijden byesteken te draghene, naer costumen vp sijnen swarten keerle, nochtans hadde hi present gheweist ten freren, daert vanden.vij.huyswerckers ghesloten was roode gewrochte biesekins te draghene, vp swarte keerels, maer hy contrarie doende, hi wort versproken vp den voorseyde helegen bloetdach vanden anderen.vi.Dekenen, te wetene den Deken vanden temmerlieden, die maetsenare, den tegheldeckere, stroodecker, plaesterare, ende saghere, maer die voorseyde Reynout foolder ende boerder mede, ende sprac vele verwaende woorden, also dat die ander.vi.Dekenen ghinghen ter camere ende gauent te kennene die vander wet.
¶ Item dese voorseyde Reynault ter camere ontboden sijnde, noch sprac hi verwaende woorden in die presencie van die vander wet. Seggende hadde hi willen gheteekent gaen, hy ware noch wel stede meester ghebleuen vanden lootghieters, sulcke ende andere grootsche woorden, hem niet berauwende. So wesen hem Schepenen voor een vonnesse, dat hi vp den toecommende sacraments dach ghecleet soude wesen ghelijc alle dander.vi.dekens, ende daer mede soude sinen paeys gemaect sijn.
¶ Item het gheuiel dat die voorseyde Reynault vp den eersten helegen Sacraments dach daer naer die recht contrarie dede, want hi cleedde sijnen keersdraghers met eenen groenen habijte, om het welcke vele rochelinge was in sint Saluators prochye. Ende anderweruen ouer hem gheclaecht sijnde, ende hem niet willende vougen ter submissien, was met eenen eerlicken dinghedaghe ghebannen.L.iaer huyten lande van Vlaendren.
Auteursrechtvrij
