Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer es volghende tverlijden vanden voorseyde graue van Simpol, in articulen.

Dat eerste artikel.

LOdewijc van Lutcenburch wijlen graue van Simpol ende conincstable van Vranckerijcke, hi heift ghekent buyten bande van pijnen voor mueghende mannen ende notable persoonen, niet bi fortsen, noch bi dreeghemente, maer bi vryen wille, dat hi den graue van Chaerloys brochte te montherry, omme te leuerene den coninc, want hi met sinen volcke trac aen deen sijde, omme twelcke hem beloeft was het conincstabelscip van Vrancrijcke.

¶ Voort heift hy verkent die selue Lodewijc van Lutcenburch, als doe hy hoorde dattet paeys ghemaect was, tusschen den coninck ende den hertoghe van Gwyenne, ende dat dye Hertoghe van Gwyenne soude ghetraut hebben des conincx dochtere van Spaengien. Dese selue Lodewijck screef neerstelick aen den hertoghe van Gwyenne eenen brief, aengaende alle ontradinghe van dien, ende dat hi dat huwelic niet doen en soude, of die coninc sijnen broeder en soude hem gheuen thertoochschip van Gwyenne, ghelijck hy hem ghenomen hadde tlant van Normandyen, maer at hi te Roome seynden soude om absolucie vander belofte die hi ghedaen hadde den hertoghe van Bourgoengien, maer dat hi hem soude doen hebben in huwelicke die dochter vanden hertoghe van Bourgoengien. Ende met aldusdaneghe lueghenen heift hy belet groot profijt der croone van Vranckerijcke.

¶ Voort dye selue Lodewijc heift ghekent dat hi mijn here Phelippe pot, ende mijn here Phelippe boutton beloefde te bringhene te sijnen acoorde den hertoghe van Borbon, ende te ghecrijghene sijnen seghele om te treckene in Sauoyen. Maer die hertoghe van Borbon en wilder hem nyet mede moeyen, ende hi wederseyt gheheelic, seggende. Om also aerme te sijne als die prophete Iob was, so en sal ic die croone niet onghetrauwe sijn.

¶ Voort kende die selue Lodewijc hoe dat hem die coninc ghebeden hadde dat hi scrijuen soude aen den coninc Edewaert van Inghelandt, ende aen die coninghinne, ende aen den here van Somberset, ende aen den heere van scales ende meer andere heren, dat si den paeys houden wilden die ghemaect was byden.Coninc.

[fol. C.lxxv.r]

ende byden graue van Werwijc, waer vp hy antwoorde dat hijt gheerne doen soude, maer hi dede al die gheheel contrarie aenden here van scales.

¶ Voort soe kende dye selue Lodewijc hoe dat die.co.van Vranckerijcke hem quam te Haen, in Vermandoys, ende hadde ghedaen maken een harryere tusschen hem ende den.co.voorseyde onder welcke barriere die.co.croop, ende quam ootmoedelic totten seluen here Lodewijc, ende nam hem vriendelic inden aerme, hem biddende dat hy hem ghetrouwe wesen soude. Twelcke hi den coninc voorseyde beloefde. Maer binnen.ij.daghen daer naer beloefde hi den hertoghe van Bourgoengien der contrarie, ende dat hi hem bouen al ghetrauwe blijuen soude, vp dat hi hem helpen wilde dat hi Conincstable mochte blijuen ende dat hy hem wilde gheuen.x^mleeuwen om sijn wapeninghe mede te houden alst hem noot ware.

¶ Voort verkende noch die selue Lodewijc dat hi ghescreuen hadde aen den hertoge K.van Bourgoengien, als dat hi noch den Coninc van Vranckerijcke leueren soude, ende hem dan sijn leuen te cortene ende te doodene, ende dat men dye Coninghinne verseynden soude varre buyten haren landen in groter ellenden.

¶ Voort verkende dye selue Lodewijc dat hi den Hertoghe van Calaberen ontraden ende verboden hadde te commene byden.co.van vranckerijcke, want dye.co.soude hem eewich gheuanghen houden. Maer riet hem te treckene te Gwysen met sijnen volcke van wapenen om bystant te doene den Inghelschen contrarie der croone van Vranckerijcke.

¶ Voort kende die selue Lodewijc dat hi den coninc van Inghelant beloeft hadde te doene hebben die stede van Amyens, Abeuile, ende Pieroone, omme sijn volc van wapenen in te legghene, ende beloefde hem dat hi hem die croone van Vranckerijcke soude doen winnen. Dies begheerde hy voor sijn deel het Graefschip van Sampaengien ende Brye Ende dye hertoghe van Bretaengien soude hebben tgraefschip van Poyntieu.