Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die edele Hertoghe Maximiliaen track met sinen edelen, ende met grooter macht in Artoys, voor die stede van Lens.

[fol. C.xcviij.r]

ITem corts hier naer track die Hertoghe Maximiliaen met sinen edelen, ende met al sinen volcke voor die stede van Lens in Artoys, ghedeelt in drie battaelgien, daer dye fransoysen clouckelick huyt quamen. Ende si maecten dat die fransoysen wisten, dat die duytschen cranckelic ghewapent waren. Ende si reden seere stranghelic vp dye duytschen, maer dander.ij.battaelgien quamen den duytschen te bate. Ende daer was seere gheuochten, so dat die Fransoysen wijcken moesten, ende vlien binnen Lens, maer haerlieder capiteyn gheuanghen, ende gheuoert te Rijssele binnen der stede.

¶ Item die Hertoghe Maximiliaen dede een starc parck maken bi pont awendijn, vp een schoon velt, ende daer slouch hi nedere met een deel van sijnen volcke, ende met eenen anderen deele trac hy in die stede, ende in tcasteel van Lannoy, ende hi dede alle die boomen vellen dye vp drie mijlen naer Doornicke stonden te Vranckerijcke waert. Aldus reedt hi altoos int harnasch tusschen sijnen parcke, Rijssele ende Lannoy, ende hi dede alle die weghen stoppen, ende vermaken dye huyt Vranckerijcke te Doornicke waert commen mochten. Ende dye edele Prinche Maximiliaen was ontrent.xiiij.of.xv.M.mannen sterck.

¶ Item dye van Ghendt waren daer ooc byden prinche ontrent.xiiij.hondert mannen metsgaders hare Casselrye. Ende sy deden een sprincreyse vp Doornicke, ende die prince was selue mede te voet tot voor die stede van doornicke. Ende hy dede alle die weghen stoppen, ende si schoten naer hem met eender serpentijne, maer daer en quam nyement huyte, want si saghen den Prinche metten volcke aen dander sijde. Ende die van Ghendt wierpen drie muelens omme, die voor die stede stonden.

¶ Item het was oock al ghedestrueirt al dat int Royaemsche stont wel tot.xvij.dorpen. Ende dye van Brugghe dye hadden daer ghesonden vele Saudenieren den moghende Prinche Maximiliaen ten onderstande, als Cranekyniers, Colueueriers, ende pijckeniers, al met rooden iorneyen, met een wit Sint Andries cruyce, achter ende vooren. Ende dyt was in dye maent van Sporcle. Anno.M.iiij^c.ende.lxxvij. Ende ontrent half vastene quamen si weder thuys metten prinche, maer tghemeente vander stede van Brugghe en was niet wel te vreden, dat men Saudeniers huyt sandt, want si hadden lieuere eene generale huytuaert ghehadt te dien eynde, dat si den slock weder in dye hant ghecreghen souden hebben. Maer dye heeren vander stede van Brugghe waren contrarie van dien, want si ontsaghen, quame tcommuyn weder in dye wapene, het soude al quaet sijn dat sy doen souden. Ende daer omme dye heeren ordonneirden datmen ontbieden soude.v.of.vi.duysent Zwitsen, ende dye souden onsen Prinche den Hertoghe Maximiliaen dienen, huyter name vander stede van Brugghe, om eenen ghenadeghen loon, dies soudemen eene settijnghe stellen onder tvolck van Brugghe, daer mede datmen die voorseyde Saudenieren betalen soude. Maer die ambochtslieden en wildent niet consenteren, ende murmureerden seere.

[Den.xv.sten dach van Sporcle]

¶ Item het gheuiel dat dye goede lieden vander wet, ende Marten lem als Burchmeester deden een waghenspel maken, het welcke ghespeelt was vp den.xv.sten dach van Sporcle, ende was in die vastene, vp den Iacoppijnessen keermesse, in welck spel beteekent was die grote dreeghinghe, die ons ghedaen was vanden coninc van Vranckerijcke, ende dat van noode was dat tvolck ghelt soude moeten gheuen omme die Saudenieren mede te betalene.

¶ Item dyt voorseyde spel was wel ende duechdelick ghemaeckt, ende sonder arghelist. Maer eeneghe vanden commune keerden alle die woorden vanden voorseyde spele in aercheden, ende si maecten groote beroerte binnen der stede, quansuys omme tspels wille. Ende die tspel ghespeilt hadden, waren ghedreecht, ende moesten hem absent houden. Ende een vanden speilders wort ghequetst, dandere hilden hem huyten weghe. By den welcken datmen wel segghen mach dye houde Vlaemsche prouerbie.      Nota.

¶ Met enen cleenen occusoene, gheraect men lichtelic te vrients huyse.

[fol. C.xcviij.v]

[Den.xxvi.sten dach van sporcle. Anno.lxxvij]

¶ Aldus en wast tspel alleene nyet dat hem lieden noopte, maer het dochte hem lieden, si hadden te beter cause ter marct of in die wapene te gane. Want vp den.xxvi.sten dach van sporcle. Anno.lxxvij.vp eenen saterdach was te Brugge iusticie ghedaen van eenen dief, dye huytewaert gheuoert was ende ghehanghen.

¶ Ende ontrent desen tijt maecten sommege vulders eene vergaderinghe, maer die wet steldese te vreden, ten besten dat si mochten Ende eeneghe die gheuanghen waren ter cause vanden voorseyde spele, dye waren ontsleghen, maer eeneghe ghebleuen in dye vanghenesse, om beter informacie, ende worden daer naer ghecorrigiert. Want corts daer naer wasser.vi.ghebannen met eenen heerlicken dinghedach. Ende noch andere waren ghewesen in diueersche Amenden.