Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Anno.M.iiijc ende lxxix.den.ij.sten dach van Septembre]

Anno.M.iiijc ende lxxix.den.ij.sten dach van Septembre was die wet vermaect naer tinhouden vanden nieuwen preuilegien,

ende waren Commissaresen

Eerst die Abt vanden Dune

Mer Wouter vander gracht

Mer Ian van nyeuwenhoue.f.Clays

Die Baliu van Brugghe

Ende Willem de wintere scouteeten van brugge

[Den.x.sten dach van Septembre]

¶ VP den.x.sten dach van Septembre so reden die prinche ende die princersse Toorscamp vp tgoet van mijn here vanden Gruythuyse, daer si bancketeirden, soupeirden, ende bleuen slapende daermen hem lieden grote triumphe ende ghenouchten dede.

[Den.xiiij.sten dach van Septembre]

¶ Item vp den seluen tijt so was te Brugghe een ghebodt ghedaen van sprinchens weghe in voorme van mandemente, dat alle die ghene die in die laetste wapeninghe in die armeye vanden prinche gheweist hadden, ende die ghene die daer noch toe ghecoren waren moesten den.xiiij.sten dach van Septembre wesen te Belle, vp ghebannen te sijne huyten lande van Vlaendren, want onse vianden hem seere ghereet maecten om weder met groter macht vp ons te commene

[Den.xv.sten dach van Septembre]

¶ Item vp den.xv.sten dach van Septembre, twelc was vp eenen saterdach, so trac die prinche naer die stede van Ipre, ende van daer te Belle, om daer te sijne byden volcke dat hi dede vergaderen, omme dat si hem te neerstegher souden ghereet maken yeghen die fransoysen terstont.

¶ Item mijn heere Ian van Dadyseele dye lach ontrent Aryen met sijnen volcke van wapenen, aldus so lach ons volc in diueerschen plaetsen, tot datse ons prinche soude seynden in ordonnancie daert hem gheliefde.

¶ Item die prinche vernemende dat die fransoysen begonsten in roere te sijne, soe vergaderede hi weder een onghetallick volck, ende vele meer dan hi hadde inden slach te Vyeuyle. Men seyde dat hy hadde wel.xl.duysent mannen, clouckelic verwachtende dye macht vanden fransoysen, maer sy en quamen niet, ende en dorsten thooft nieuwers huyt steken, want dye vlaminghen trocken al tot leden Atrecht, maer si en vonden nyeuwers gheen fransoysen. Het was als doe eenen heeten somere ende drooghe, ende die prinche dede assault vp diueersche Casteelen ende sloten, die hy in sticken schoot. Ooc souden si vp Theerenburch assault ghedaen hebben, ende tvolck wasser wel toe ghewillich, maer daer waren eeneghe van sijnen Rade die ontriedent hem segghende. Heere eest dat ghi die stede destrueirt, so doet ghijt huwen properen goede. Ende naer dyen dat die fransoysen niet en commen, ic soude vertrecken, ende tvolc orlof gheuen.

¶ Item die Prinche dit hoorende, volchde den raet van sijnen heren, ende hi gaf al dat schoon volck orlof, ende vertrocken alle te gader thuysewaert. Ende also saen als die garnisoenen van Theerenburch, van Bethune, ende van Hesdijn hoorden dat die vlaminghen vertrocken waren, si quamen te Vlaendren waert, ende deden groot quaet van brande ende van rooue, maer het was te haestelick vertrocken. Ende dye ghene diet hem rieden en waren sijn vrienden niet, noch vrient van den lande.