Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xviii.sten dach van Sporcle]

Item vp den.xviii.sten dach van Sporcle, smaendaechs voor vastenauent, doen quam die prinche ende dye princersse metter Duwagiereghe, ende alle die principale edele vanden houe tsauents ter maeltijt ten huys van Maertin lem, gheheeten Rijckenburch, staende aen die conincx brugghe, daer een chierlicke maeltijt bereet was, daer sy seer eerlic ontfaen waren, ende daer hem lieden grote triumphe ghedaen ende ghetoocht was van diueersche entermessen, ende gerechten, ende van musijcken, ende andere costelicheden tot sulc een maeltijt dienende.

[fol. CC.xxiij.v]

¶ Item vp den seluen dach was te Brugge een ghebodt ghedaen dat mijn here die Cardenael, als bisschop van Doornicke sijnde, consenteirde omme den dieren tijt wille alle aerme menschen, dat sy mochten al den vasten duere suuel eten, te wetene buetere ende melc, huytghesteken die vier laetste daghen van der goeder weke. Ende dyt was gheconsenteirt vanden Bisschop van Doornicke al sijn Bisschopdom duere.

[Den.xix.sten dach in Sporcle]

¶ Item sdijsendaechs vp den vastenauent, den.xix.sten dach in Sporcle doe quamen in tswijn ter sluys vele schepen gheladen met coorne, ende brochtens wel.ix^m.hoet of meer, ende was huytnemende schone tarwe, ende sy quamen so men seyde huyt Ceuijlgien.

¶ In desen seluen tijt die princersse Marye van Bourgoengien en liet haer niet gheraden noch regieren, alsoo sy wel schuldich was van doene, maer si liep menich waruen spelen vp thijs met scauerdijnen ende met scricschoen tusschen der Ghendt poorte ende der cruyspoorte vp die meerschen, ende si viel dicwijls meneghen quaden val, also dat spel in heift, ende haer Ioncfrauwen hadden seer grote ghenouchte met haer te dien tijt gheduerende.

¶ Item si hilt altoos bi haer mijn here van Gaesbeke, nyet yeghenstaende dat hy te Ghendt ghebannen was, alst voorseyde es, daer die van Ghendt seer in tonvreden waren Ende Vlaendren leedt ontrent desen tijt vele wederstoots vanden Fransoysen, ende al twestlant duere, daer si veil quaets daden.