Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hier beghint van diewonderlicke Regnacie ende Fortunen van Oorloghen]

Hier beghint van diewonderlicke Regnacie ende Fortunen van Oorloghen, ghesciedende ende beghinnende naer den ouerlijdene vander Princersse Marye van Bourgoengien, beghinnende vanden Iare.Lxxxi.tot den iare.xvc.ende een. Ende hoe die Prinche Maximiliaen, met die drie Leden van Vlaenderen, als Brugghe, Ghendt, Ypre, Raedt hieldt, hoe datmen Tlandt van Vlaendren, best soude moghen regieren, ende houden in Eeren, ende in state van Paeyse.

¶ Dat.lxviij.Capittel.

[Den.viij.sten en den xi.sten en den.xiiij.sten en den xvij.sten en den xix.sten dach van April]

ITem als dye eerweerdeghe Princersse ouerleden ende begrauen was, so was gheordonneirt byden prinche Maximiliaen, ende byder wet van Brugghe, datmen te Ghendt seynden soude eerlicke ghedeputeirde. Twelcke alsoo ghedaen was, ende was van die van Ghendt seer danckelick ghenomen, ende beloofden te Brugghe te commene by den Hertoghe ende by die van Brugghe, alsoo si deden. Ende waren eeneghe vander wet van Ghendt, metten ouerdekene, ende den voorschepene, ende meer ander notable dye te Brugge quamen in schoonen ghetale, wel.L.peerden of meer, vp den.viij.sten dach van April naer Paesschen.Anno.M.iiij^c.ende.lxxxij.daer si eerlic ontfanghen waren. Ende die wet van Ipre was ooc te Brugghe ontboden, die welcke daer ooc quamen met schonen

[fol. CC.xxvi.v]

state. Ende daer was groten Raet ghehouden, hoe datmen tlant van Vlaendren best soude moghen houden in eeren ende in state. Ende naer vele voorsienicheden daer vp gheaduiseirt, so was daer gheconcludeirt ende ghesloten byden drie leden tlandts van Vlaendren, als Ghendt, Brugge ende Ypre, als dat si malcanderen ghetrauwelicke ende eendrachtelicke bi blijen souden totter doot toe. Ende in teekene van warachticheden, so beseghelden si ditte malcanderen, elck metten seghele van sijnder stede. Ende dit ghedaen sijnde, doe was mijn heere van Dudzeele, als doe burchmeester sijnde van Brugghe gheslaect van sijnen eede., ende alle die wethouders van ghelijcken. Ende dyt was vp den.xi.sten dach van April naer paesschen vp eenen donderdach, omme welcke saken men wel scrijuen mach, dat die weerelt nyet en is dan een wiel van auentueren, keerende ende wendende menichsins. Aenghesien dat vander tijt dat vrau Marie ouerleet, totter tijt dat den ionghen Hertoghe Phelips het lant beswoer selue in persone, men vele dinghen diueerschelick veranderen sach. Aengaende Ghendt, Brugge, ende Ipre, alsoomen int langhe hier naer noch hooren sal.

¶ Item vp den.xi.sten dach van April.Anno.M.CCCC.ende.lxxxij.so was in tschepen huys van Brugghe een schone maeltijt ghehouden, ter eeren van die van Ghendt ende die van Ipre. Ende dese maeltijt ghepasseert sijnde, so ghinghen die ghedeputeirde van Ghendt byden prinche. Ende oorlof ghenomen hebbende, trocken thuysewaert, ende eeneghe ghedeputeirden van Brugghe trocken met hem lieden, ende die Hertoghe Maximiliaen track mede te Ghendt dye wet vermakende, ende die Baliu Scouteeten van Brugghe trocken huyter stede van Brugghe, ende meer andere diueersche persoonen.

¶ Item om onsen heere te bedanckene van deser eendrachtichede, so was te Brugghe gheordonneirt eene processie generale, die men drouch tsinte Donaes metten drie fierters, te weten sinte Donaes, sinte Bazelis, ende sinte loy, vp den.xiiij.sten dach van april, ende was den sondach van Quasimodo.

¶ Item vp den.xvij.sten dach van April.Anno.lxxxij.doe was mer Kaerle van huytkercke Baliu vander stede van Brugghe ghemaect, ende Maertin Lem Scoutheetene van Brugghe. Ende vp den.xix.sten dach van April.anno.M.CCCC.ende.lxxxij.doe was die wet van Brugghe vermaect, ende waren als doe Burchmeesters ghemaect, mer Ian van Nyeuwenhoue, ende Ian die vleeschauwere.