Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp desen seluen tijt so dede mijn heere van Rommont]

Item vp desen seluen tijt so dede mijn heere van Rommont, als Capiteyn generael vander zee, met sijnen gheselschepe groote weere, omme tlandt te beschuddene, ende deden daghelicx groote schermutsinghe vp tsconincx volck. Ende si behilden Cazant vp dyen tijt dattet nyet verbarrent en was, maer meest al volck van Cazant vloot met sijnen goede al binnen der stede vander Sluys.

¶ Item vp desen tijt ontrent half vastene, so quam mijn here van Rommont in tcleen casteel vander sluys, ghenaemt den thorre van Bourgoengien, die welcke daer in stelde eenen nyeuwen capiteyn, ghenaemt Iaques iaquijnet, een vroom man van wapenen, in die stede van Anthonis van Nieuwenhoue. Ende alle die oude Saudeniers die doe daer in waren, waren huyt ghedaen gaen sonder mesdoen, ende hu stelde daer inne nyeuwe Saudeniers van sijnen volcke, twelcke tlandt van Vlaendren daer naer wel becochte.

¶ Item vp desen seluen tijt so was bastaert Commuyn Capiteyn ghemaect van eender cleender Roeybaerge vander Sluys, wel voorsien van engienen ende van volcke, ende voeren daghelicx ter zeewaert inne duer tswarte gat naer Zeelandt. Ende vp eenen tijt quamen si te Vlissinghe aen lant ende vijnghen daer eenen Clays vanden beckene vanden Damme, ende Pieter snellaert van ghendt, ende brochtense gheuanghen ter Sluys, ende waren ghebrocht bi consente van mijn Heere van Rommont in tcleen casteel, ende bleuen daer gheuanghen, daer hem lieden dye Capiteyn vele duechden bewees, ende was achter naer qualick daer of gheloont.