Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Item noch vp den xvi.sten dach van Maerte, so was noch ghesonden eenen brief van ghendt.

Te wetene van beede die bancken, Te wetene van beede die bancken, ende van sommege andere heren vander stede vriendelicke groetenesse aen die heren ende wet, Scepenen, ende Raet dat ter dachuaert daer ghecommen waren alle dye ter dachuaert te Mechelen gheweist hadden vergadert, ende dat die van Hollandt, Zeelant Brabant ende van Vrieslant daer commen souden, daer omme dat die dachuaert eenen dach verstelt was bet voort, maer hilden altoos raet ende eene voor aduijs, als omme die vordernesse vander begheerte vanden paeyse te houdene dye ghemaect was int iaer.M.iiij^c.ende.lxxxij.ende si seyden dat sijt ooc also houden wilden. Ende doe was hem lieden noch voort ghetoocht den groten last, schade ende interest dye den graue Phelips daer of ghecommen was, te sijnen groten verliese ende quetse van sijnen lande van Vlaendren.

¶ Item vp den seluen.xvi.sten dach van Maerte, sonden dye ghedeputeirde van Brugghe die te Ghendt ter dachuaert waren vriendelicke groetenesse.etc. Voort om te laten wetene wat si besoengierden ende ghebesoengiert hadden. Ende hoe dat ter dachuaert vergadert ende ghecommen waren die naeruolgende staten ende landen. Eerst Hollant, Zeelant, Brabant ende Henegauwe, ende meest alle die landen. Ende daer was ghecommen mijn heere vanden Gruythuyse, mijn here van Rauesteyn santer eenen ghedeputeirde met sijnen laste, ende mer Phelips van Rauesteyn sandt als ghedeputeirt met sijnen laste Ian vander fonteyne. Ende daer was een here ghecommen huyt Vranckerijcke, die welcke brochte tijdinghe, hoe Monseur descordes hadde ghedaen roupen alle die frontieren van Vranckerijcke duere paeys vp tghemeene lant van Vlaendren. Twelcke was vry varende ende keerende, ende coopmanscepen daer doende die dattet ghelieuen soude, ende dat hi hoopte dat die besegelthede van dien hier corts wesen soude, want die coninc van Vranckerijcke wilde hem houden aen den paeys die int iaer van.lxxxij.ghemaect was ende besegelt, sonder eeneghe inbroke of valscheyt daer in te laten gheschieden. Ende daer was den seluen Ambassaduer gheseyt ende vertoocht ende belast dat hi den Coninc segghen soude, datmen daer vp die huere in dye voorseyde dachuaert metten seluen sticke besich was. Ende waren daer vergadert om dat ghemeenlic te concluderen ende te sluytene

[Den.xvij.sten dach van Maerte en den eersten dach van Sporcle]

¶ Item voort vp den.xvij.sten dach van Maerte, so was die voorseyde weder ghebrocht vp die marct vp tscauot, ende was daer gheexamineirt met woorden, maer hy en wilde niet lijden, maer alsmen hem seyde van weder vp die pijnbanc te leggene, so seyde hi dat hijt verkennen soude al datter of ware. Ende leet daer buyten bande van pijnen, hoe dat hi voortstelder was vanden poorters te doen leenene, ende van maentghelt te doen gheuene, sonder ghebodt van sijnen here. Ende noch so verkende hi, hoe dat hi medeplegher was van te

[fol. CC.xxxvij.r]

doene heesschene een seuencie van penninghen, sonder consent vanden ghemeenen volcke van der stede. Twelcke hi kende dat foortse was, ende verkende ooc dat hi medepleger, ende voortstelder was vander vergaderinge inden burch, vp den eersten dach van Sporcle, svrydaechs vp onser vrauwen auent, ende dat datte was omme in te latene het garnisoen vanden Heynewiers, ende was oock huyte omme tghemeente tonder ende seere cort te houdene. Ende dat hi inden burch commende ende Petijt salasaert ende meer andere van haren medepleghers seyden yegens malcanderen, laet ons eerst in dye weere wesen, eer die vileynen ter marckt commen, ofte eeneghe vergaderinghe maken. Ende doe riep Salasaert, laet ons alle dye bouuen doot slaen, soe hebben wijt al naer onsen wille. Verkende ooc aldaer hoe dat bi sijnen Rade een lettel tijts daer te voren, eenen temmerman onnoselic ende met cleender cause onthooft was ende ghebrocht vanden leuenden lijue ter doot. Ende leet noch van vele sware sticken den lande aengaende, ende was als doe weder gheleet vp die halle tot tsander daechs.