Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxvi.sten en den xxvij.sten en den achtentwintichsten dach dach van Maerte]

Item vp den.xxvi.sten dach van Maerte, soe was by aduijse eenen subtijlen raet gheuonden ende maniere, als dat tvolck vander marckt ghegaen soude hebben met haren tenten ende pauwelioenen elc in tsijne, ende men soude hem lieden besorghen, van al dies hem lieden soude behouwen ofte orborlic wesen mochte, ende der stede ende ooc den lande. Vanden welcken sy als doe te vreden waren, ende seyden tslot te sluytene des ander daechs den.xxvij.sten dach in Maerte. Ende dit ghehoort vp den seluen dach, so vergaderden dye.xvij.neeringhen in die halle vp taduijs als voren. Ende hem lieden dochte dat taduijs nyet goet en was, metsgaders dat sy hare beseghelthede noch nyet en hadden, dye welcke nyet te ghecrijghene en was, ten ware dat dye dachuaert te Ghendt ghedaen ware ende ooc te Bruessele, daer si van Ghendt gheleyt was. Ende ooc omme dye brieuen aengaende tledt van den Vryen, dye welcke brieuen waren te Remerswale in Zeelant, in een kiste, daer seuen kistkins inne ghesloten waren, elc met sonderlinghe slotelen, welcke slotelen hadden in haer handen dese naervolghende. Te wetene mijn here Willem van Grijspeere ende mijn heere van Poucke. Ende die selue kiste dede Pieter lanchals voeren in Zeelant te Remerswale, alsoo saen als hy beuoelde dat tvolck wat wedersporich begonste te wordene yeghen dye groote heesschen die hy hem lieden daghelicx voren leyde, omme dat die selue kiste onghereet soude sijn ende quaet om vinden, ende die selue verbanden niet te nieten te brijnghene, als aengaende het let vanden Vryen ende vele meer andere saken, soe wast dat mijn heere van Remerswale den.xxvij.sten dach van Maerte begheerde ende voortstelde, aenghesien dat hi sach dat die.xvij.neeringhen vergadert waren ende vander marct niet scheeden en wilden, ende vp dien dach dedemen een messe vanden heleghen gheeste, want dye heeren meenden dat sy dien dach vander marct ghegaen souden hebben, maer sy seyden dat si huyter wapene noch vander marct niet gaen en souden om den laetsten man te waghene, voor ander stont dat si hadden die selue brieuen ende al haerlieder rechten ende saken al claer. Ende dit mijn here van Remerswale verstaende, sandt terstont den Schouteetene mer Pieter mattyneye aen dye.xvij.neeringhen, vraghende of si mijn heere van Remerswale wilden laten trecken omme die selue brieuen met sekere ende boorchtocht binnen der stede van Brugghe, hy soudse vp sijnen plucht seynden tot Oostende. Ende wilden si dat niet doen, als dat si souden seynden mannen huyten neghen leden vp haerlieder plucht, hy soude die selue diligencie doen die hy nemmermeer en soude connen en moghen dat sijse ghecrijghen souden,

[fol. CC.xli.r]

ende hy daer mede ontlast wesende. Ende aldus daer noch wesende, quamen ghedeputeirde vanden Vryen, ende bedancten seere die.xvij.neeringhen van haerlieder bystant ende besorchsaemheyt dye si ghedaen hadden, ende seyden dat si wel versekert waren ende wel te vreden omme vander marct te gane met die van Brugghe. Doe vraechden wi van Brugghe of sy borghe wilden blijuen voor mijn heere van Remerswale, ende meer andere heren. Ende si seyden neen. Doen ghinc men vraghen het ghemeene peuple vanden Vryen of si te vreden waren, maer si seyden neens, ende baden om bystant aen ons ghemeente van der stede van Brugghe om die doot die god starf, het welcke wi hem lieden beloofden te doene, omme dat sy gheobegiert hadden. Doen antwoorden wy wedere den heere van Remerswale als dat wijer selue omme trecken souden, maer dat hi diligencie doen soude dat wijse ghecrijghen mochten binnen.v.daghen vp sijn hooft te verliesene, twelc hi aen nam daer inne tbeste te doene ende hi was weder vp dye halle gheleet gheuanghen, tot dattet ghebuert soude wesen. Ende terstont waren gheordonneirt ghedeputeirde vander stede van Brugge datmen trecken soude ter Sluys bi mijn heere van Santrein, twelc also ghedaen was. Ende binnen der stede vander sluys commende, waren seere willecomme, ende van mijn heere van Santrein seere blijdelick ontfanghen, die hem lieden dede bereeden een costelic bancket. Ende daer vraechde mijn here van Santrein hem lieden, waer omme dat si den Roomschen coninck soe vaste hilden, ende seyde hem lieden dattet niet wel ghedaen en was, aenghesien sijn grote edelheyt. Ende badt hem lieden dat si hem wilden laten gaen achter die strate wel verwaert sijnde daert hem gheliefde, ende hem dochte dat datte best ghedaen soude wesen, ten orbore ende profijte vander stede van Brugghe, ofte waert sake dattet nyet en ghebuerde binnen.vi.daghen daer naer, het soude ons berauwen, maer dyt doende soude altoos ons vrient wesen, ende voor ons bereet totter doot toe. Ende ons ghedeputeirde quamen vander Sluys den achtentwintichsten dach van Maerte, ende brochten ons die antwoorde te Brugghe, ende daer of veraduerteirt wesende, was ghesloten dat den Roomschen coninc binnen der stede van Brugghe soude wandelen, ende gaen daert hem beliefde wel bewaert sijnde, maer het en ghebuerde soe niet. Ende dat was ghelaten huyt vreesen of hem eeneghe quade bouuen eenich hinder of leet mochten ghedaen hebben in sijnen edelen persoon.

[Den.xxvij.sten en den den.xxix.sten dach van Maerte]

¶ Ende vp den.xxvij.sten dach van Maerte, so sloten dye hooftmannen ende dye seuenthien neeringhen, ende die vier neeringhen, met alle den andere Dekens dye ter marckt stonden, dat sy malcanderen bystaen souden totter doot, ende vander marckt niet te scheedene ten ware dat si alle hare saken wel ende ghetrauwelicke vaste ghesloten ende beseghelt hadden. Ende ordonneirden van dier tijt voort haerlieder wake in vieren, omme datmen soude die andere daghen dienst wake dat niet en ware soude moghen wercken. Ende dat omme ontlast te sijne vander roupinghe ende crijsschinge vanden schamelen volcke, het welcke was gheordonneirt vp den.xxix.sten dach van Maerte.